کراچی دھماکہ: وزیراعلیٰ نے تحقیقات کا حکم دے دیا

?️ 18 دسمبر 2021

کراچی (سچ خبریں) کراچی میں شیر شاہ پراچہ چوک کے قریب ہونے والے دھماکے کے نتیجے میں گیارہ افراد کے جاں بحق ہونے اور بارہ افراد زخمی ہونے کے اطلاع موصول ہے جس کے  بعد وزیراعلیٰ سندھ سید مرادعلی شاہ نے فوری نوٹس لیتے ہوئے تحقیقات کا حکم دے دیا ہے۔

وزیراعلیٰ سندھ نے کمشنر کراچی کو واقعے کی انکوائری کرنے کا حکم دے دیا، انہوں نے ہدایات دیتے ہوئے کہا کہ انکوائری میں ایک پولیس افسر بھی شامل کیا جائے تاکہ ہر پہلو سےچھان بین ہوسکے۔سید مرادعلی شاہ نے اپنے ایک بیان میں دھماکےمیں ہونے والے جانی نقصان پر گہرے دکھ کا اظہار کیا اور جاں بحق ہونے والے افراد کے لواحقین سے اظہار تعزیت کیا۔

اس کے علاوہ وزیراعلیٰ سندھ نے سیکریٹری صحت کو سول اسپتال میں ضروری سہولیات فوری دینےاور  انتظامیہ کو اسپتال اور جائے وقوعہ پر پہنچ کر متاثرین کی ہرممکن مدد کرنے کی ہدایات بھی دی ہیں۔اب تک کی تازہ  ترین اطلاعات کے مطابق  ریسکیو ذرائع کا کہنا ہے کہ دھماکے میں 11 افراد جاں بحق جبکہ 12 زخمی ہوگئے ہیں جنہیں طبی امداد کیلئے اسپتال کیا جا چکا ہے۔

واضح رہے کہ گورنر سندھ عمران اسماعیل نے بھی دھماکے میں جانی نقصان پر دکھ اور افسوس کا اظہار کرتے ہوئے زخمیوں کو طبی امداد پہنچانے کی ہدایت کی۔ انہوں نے ایڈیشنل آئی جی کراچی اور کمشنرکراچی سے تفصیلی رپورٹ بھی طلب کرلی۔