پی ٹی آئی اور الیکشن کمیشن کے درمیان لفظی جنگ جاری

?️

اسلام آباد(سچ خبریں)پاکستان تحریک انصاف اور الیکشن کمیشن آف پاکستان کے درمیان لفظی جنگ اس وقت نئی بلندیوں کو پہنچ گئی جب سابق وزیر اعظم عمران خان نے چیف الیکشن کمشنر پر ان کی پارٹی کے خلاف ’متعصبانہ فیصلے‘ کرنے کا الزام لگایا اور چیف الیکشن کمشنر نے پی ٹی آئی کے اس بیانیے کو ’کمیشن کو بدنام کرنے کی ایک سوچی سمجھی کوشش‘ قرار دیتے ہوئے مسترد کردیا۔

میڈیا رپورٹ کے مطابق ایک بیان کے ذریعے چیف الیکشن کمشنر نے افسوس کا اظہار کیا کہ یہ تاثر دیا جارہا ہے کہ الیکشن کمیشن آف پاکستان میں ایک فرد کی طرف سے فیصلے کیے گئے حالانکہ یہ الزام زمینی حقائق کے برعکس ہے۔

پی ٹی آئی چیئرمین کے ’بے بنیاد‘ الزامات کو مسترد کرتے ہوئے چیف الیکشن کمشنر نے کہا کہ الیکشن کمیشن ایک آئینی ادارہ ہے جو تمام فیصلے آئین اور قانون کی روشنی میں کرتا ہے۔

انہوں نے کہا کہ بعض عناصر جان بوجھ کر یہ تاثر دینے کی کوشش کر رہے ہیں کہ الیکشن کمیشن میں انفرادی طور پر فیصلے کیے جا رہے ہیں جو کہ غلط اور حقائق کے منافی ہے۔

الیکشن کمیشن آف پاکستان نے کہا کہ جنوری 2020 سے لے کر آج تک تمام فیصلے اتفاق رائے سے کیے گئے اور ایک بھی فیصلہ ایسا نہیں تھا جس میں اختلافی نوٹ لکھا گیا ہو، چیف الیکشن کمشنر اور کمیشن کے ارکان کے درمیان مکمل ہم آہنگی ہے۔

الیکشن کمیشن آف پاکستان ملک کے بہترین مفاد میں آئین کے تحت اور حلف کے مطابق بغیر کسی دباؤ کے فیصلے کرتا رہے گا۔

یہ بیان پی ٹی آئی کے چیئرمین عمران خان کی جانب سے چیف الیکشن کمشنر سکندر سلطان راجا پر پاکستان مسلم لیگ (ن) کے ’ایجنٹ‘ ہونے کا الزام عائد کرنے اور ان سے فوری طور پر استعفیٰ دینے کا مطالبہ کرنے کے بعد سامنے آیا ہے۔

سابق وزیراعظم نے کہا تھا کہ پی ٹی آئی کو چیف الیکشن کمشنر پر اعتماد نہیں ہے، جب ملک کی سب سے بڑی جماعت کو چیف الیکشن کمشنر پر اعتماد نہیں ہے تو انہیں استعفیٰ دینا چاہیے۔

عمران خان نے الزام لگایا کہ چیف الیکشن کمشنر سکندر سلطان راجا کو عہدے پر رہنے کا حق نہیں، وہ تنہا فیصلے کرتے ہیں اور ان کے تمام فیصلے پی ٹی آئی کے خلاف ہوتے ہیں۔

اپنی پارٹی کے خلاف غیر ملکی فنڈنگ ​​کیس کا ذکر کرتے ہوئے سابق وزیر اعظم نے دیگر بڑی سیاسی جماعتوں کے خلاف بھی ایسے ہی مقدمات شروع کرنے کا مطالبہ کیا۔

عمران خان نے الزام لگایا کہ غیر ملکی فنڈنگ ​​کیس میں میری پارٹی کے خلاف ثبوت گھڑنے کی سازش کی گئی۔

چیف الیکشن کمشنر نے صحافیوں کو بتایا کہ الیکشن کمیشن آف پاکستان، پی ٹی آئی کے منحرف اراکین قومی اسمبلی کا کیس 30 دن میں نمٹا دے گا۔

الیکشن کمیشن کے تین رکنی بینچ نے آرٹیکل 63 (اے) کے تحت 20 منحرف اراکین قومی اسمبلی کو نااہل قرار دینے کے ریفرنس کی سماعت کی جبکہ باڈی نے اس درخواست پر فیصلہ محفوظ کرلیا جس کے مطابق دو ارکان کی ریٹائرمنٹ کے باعث کمیشن نامکمل ہونے کی وجہ سے وہ ریفرنسز کی سماعت نہیں کر سکتا۔

سماعت کے آغاز میں چیف الیکشن کمشنر نے کہا تھا کہ ادارہ اختلاف کرنے والے ہر رکن کو بلائے گا اور ’کہانی کا دوسرا رخ‘ سنے گا۔

منحرف اراکین قومی اسمبلی نور عالم خان کے وکیل نے تین رکنی بینچ کو بتایا کہ ان کے مؤکل نے تحریک عدم اعتماد کے وقت نہ تو اپنی پارٹی سے استعفیٰ دیا تھا اور نہ ہی انہوں نے کسی اور سیاسی جماعت میں شمولیت اختیار کی تھی۔

اس کے علاوہ یہ کمیشن نامکمل ہے اس لیے وہ اس کیس کی سماعت نہیں کر سکتا، انہوں نے یاد دلایا کہ اسی طرح کا ایک کیس 2015 میں الیکشن کمیشن آف پاکستان کے سامنے لایا گیا تھا، اس وقت الیکشن کمیشن نے حکم دیا تھا کہ صرف ایک مکمل کمیشن ہی ایسے مقدمات کی سماعت کر سکتا ہے۔

پی ٹی آئی کے وکیل نے نور عالم کے وکیل ان تحفظات پر اعتراض کیا لیکن نور عالم کے وکیل نے زور دے کر کہا کہ کمیشن دوسرے کیسز سن سکتا ہے، یہ کیس نہیں اور اس کمیشن کے نامکمل ہونے کی وجہ یہ ہے کہ سیاسی رہنما ایک دوسرے سے رابطہ نہیں کرتے۔

دلائل سننے کے بعد چیف الیکشن کمشنر نے کہا کہ اسپیکر قومی اسمبلی راجا پرویز اشرف اپنا جواب جمع کرائیں۔

چیف الیکشن کمشنر نے کہا کہ کمیشن منصفانہ سماعت کرتا ہے، اسپیکر ریفرنس کی ایک کاپی لے کر 6 مئی کو اپنا جواب جمع کرا سکتے ہیں، ہم 30 دنوں میں کیس کو سمیٹ لیں گے۔۔

سکندر سلطان راجا نے سماعت 6 مئی تک ملتوی کر دی جب اسی دن پنجاب اسمبلی کے 26 اراکین ان کے خلاف نااہلی کی درخواست پر الیکشن کمیشن آف پاکستان کے سامنے پیش ہوں گے۔

مشہور خبریں۔

حماس کا مسجد اقصیٰ کو یہودی بنانے کی سازش کے خلاف اعلان جنگ

?️ 8 مئی 2025سچ خبریں: حماس کے سیاسی دفتر کے رکن اور قدس امور کے سربراہ

صیہونی فوجی غزہ نامی ایک بڑی گھات میں داخل

?️ 8 نومبر 2023سچ خبریں:Haaretz اخبار کے مطابق ایک ہفتے سے زیادہ زمینی پیش قدمی

سوڈان میں تنازعات سے کیا حاصل ہوا ہے؟ اقوام متحدہ کی رپورٹ

?️ 13 اپریل 2024سچ خبریں: سوڈان میں اقوام متحدہ کے فیکٹ فائنڈنگ مشن نے اعلان

پہلی بار پاکستانی خاتون کو ڈیانا لیگیسی ایوارڈ سے نواز دیا گیا

?️ 16 مارچ 2024اسلام آباد: (سچ خبریں) پاکستان کی تاریخ میں پہلی بار روحیل فاؤنڈیشن

کابل میں امریکہ کے خلاف مظاہرہ

?️ 21 دسمبر 2021سچ خبریں:امریکہ کی طرف سے افغانستان کے مرکزی بنک کی مسلسل ناکہ

فرانس اور شیلی کے سربراہوں نے غزہ میں جنگ بندی کا مطالبہ کیا

?️ 19 جون 2024سچ خبریں: فرانسیسی اور شیلی کے صدر ایمانوئل میکرون اور گیبریل بورک نے

پولیس کی عمران خان کو گرفتار کرنے کی کوشش، پی ٹی آئی کی ملک گیر احتجاج کی دھمکی

?️ 5 مارچ 2023اسلام آباد:(سچ خبریں) سابق وزیراعظم اور پاکستان تحریک انصاف کے چیئرمین عمران

صہیونی میڈیا: ایران کی جانب سے اب تک کم از کم 200 میزائل داغے جا چکے ہیں

?️ 14 جون 2025سچ خبریں: صہیونی میڈیا نے رپورٹس میں اعلان کیا ہے کہ ایران

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے