پنجاب اسمبلی میں ہمارے 187 ووٹ پورے ہیں،فواد چوہدری

?️ 9 جنوری 2023

لاہور: (سچ خبریں) تحریک انصاف کے رہنما اور سابق وزیر اطلاعات فواد چوہدری کا کہنا ہے کہ پنجاب اسمبلی میں ہمارے 187 ووٹ پورے ہیں،اعتماد کا ووٹ لینا کوئی مشکل نہیں۔

میڈیا رپورٹس کے مطابق فواد چوہدری نے ن لیگ کے وزراء کے پنجاب اسمبلی پہنچنے پر انہیں شدید تنقید کا نشانہ بناتے ہوئے کہا ہے کہ پنجاب اسمبلی پہنچنے والے وہ ہیں جن کا مال نہیں بکا،ہم بھی جواب دینے کیلئے پنجاب اسمبلی آئیں گے۔

صوبائی اسمبلی میں ہمارے ارکان پورے ہیں اور ہمارے لیے اعتماد کا ووٹ مشکل نہیں ہے۔ دوسری جانب وفاقی وزیر دفاع خواجہ آصف پنجاب اسمبلی پہنچے تو صحافی نے سوال کیا کہ آپ کے پاس 186 کے بجائے 180 ممبرز بھی نہیں ہیں۔ خواجہ آصف نے صحافی کے سوال پر کہا کہ مجھے اتنا حساب تو نہیں آتا مگر ہمارے نمبرز پورے ہیں۔

یاد رہے کہ ن لیگ نے پنجاب اسمبلی میں بھرپور طاقت کے مظاہرے کیلئے تیاری پکڑ لی ہے۔

جبکہ پنجاب میں وزیراعلٰی چوہدری پرویز الٰہی کے اعتماد کے ووٹ کے معاملے پر مسلم لیگ ن اور پیپلز پارٹی کی مشترکہ کمیٹی بنادی گئی۔ اس کمیٹی میں مسلم لیگ ن سے وزیر قانون اعظم نذیر تارڑ، خواجہ سعد رفیق، رانا ثنا اللہ، عطا تارڑ اور پیپلز پارٹی کی جانب سے حسن مرتضیٰ شامل ہیں۔کمیٹی پنجاب میں وزیراعلیٰ چوہدری پرویزالٰہی اعتماد کے ووٹ سے متعلق متحرک ہوگی،جس کا مقصد وزیراعلیٰ کے اعتماد کا ووٹ لینے کے دن تمام قانونی اور آئینی پہلوؤں کا جائزہ لینا ہے اور 11 جنوری کو لاہور ہائی کورٹ میں بھی قانونی ٹیم مکمل تیاری کے ساتھ پیش ہوگی،جبکہ اسی سلسلے میں ماڈل ٹاؤن میں مسلم لیگ ن کے پارٹی رہنماؤں کا اجلاس ہوا جس میں پنجاب کی سیاسی صورت حال اور وزیراعلیٰ پنجاب چوہدری پرویز الہیٰ کے اعتماد کے ووٹ حوالے سے گفتگو کی گئی، ن لیگ کے ذرائع نے بتایا کہ اجلاس میں وزیراعلیٰ پنجاب کی جانب سے اعتماد کا ووٹ نہ لینے کے بیان پر غور کیا گیا جب کہ وفاقی وزیر قانون نے وزیراعظم کو اعتماد کا ووٹ نہ لینے کے معاملے پر آئینی اور قانونی نکات سے آگاہ کیا۔