پاکستان کے مضبوط دفاع کیلئے مستحکم معیشت ضروری ہے، ایئر چیف ظہیر بابر سدھو

🗓️ 4 جنوری 2025

اسلام آباد: (سچ خبریں) ایئر چیف ظہیر احمد بابر سدھو نے مضبوط دفاع کے لیے مستحکم معیشت کو ضروری قرار دے دیا۔

ڈان نیوز کے مطابق پاکستان نیول اکیڈمی کراچی میں 122 ویں مڈشپ مین اور 30 ویں شارٹ سروس کمیشن کورس کی پاسنگ آؤٹ پریڈ کی تقریب سے خطاب کرتے ہوئے ایئر چیف ظہیر احمد بابر سدھو نے واضح کیا کہ ملک کے مضبوط دفاع کے لیے مستحکم معیشت ضروری ہے، پاک فضائیہ خطے میں طاقت کا توازن برقرار رکھنے کے لیے کردار ادا کر رہی ہے۔

ایئر چیف نے کہا کہ پاکستان نیول اکیڈمی دنیا کے بہترین اداروں میں شامل ہے، پاک بحریہ سمندری سرحدوں کی حفاظت میں کلیدی کردار ادا کررہی ہے، دنیا کو متعدد چینلجز کا سامنا ہے، ہمیں بھی عالمی سطح پر مختلف چیلنجز کا مقابلہ کرنے کے لیے تیار رہنا ہوگا۔

تقریب میں کمیشن حاصل کرنے والے 79 افسران میں 50 مڈشپ مین اور 29 ایس ایس سی کورس افسران شامل تھے۔

چیف آف دی نیول اسٹاف ایڈمرل نوید اشرف نے تقریب سے خطاب کرتے ہوئے کمیشننگ کوسفر کا آغاز قرار دیا، انہوں نے کہا کہ بحری سرحدوں کی حفاظت یقینی بنائیں گے۔

پاسنگ آؤٹ تقریب میں اعلیٰ سول و عسکری حکام کے ساتھ غیر ملکی مندوبین کی بڑی تعداد نے بھی شرکت کی۔

قبل ازیں پاسنگ آؤٹ پریڈ میں کیڈٹس نے شاندارپریڈ کا مظاہرہ کرتے ہوئے قومی پرچم کو سلامی دی۔

کمانڈنٹ پاکستان نیول اکیڈمی کموڈور تصور اقبال نے پریڈ سے خطاب کرتے ہوئے کہا کہ کیڈٹس کوجدید خطوط پر تربیت فراہم کی گئی ہے، کیڈٹس نے جدید آپریشنز میں حصہ لینےکی تربیت بھی حاصل کی۔

اس موقع پرپاکستان نیول اکیڈمی میں کیڈٹس نے شاندارپریڈ کا مظاہرہ کیا اورقومی پرچم کوسلامی دی، مہمان خصوصی ایئرچیف مارشل ظہیر احمد بابر سدھونے پریڈ کامعائنہ کیا۔

پاکستان نیوی کے جوانوں نے خوبصورت اندازمیں فن کامظاہرہ کیا، چیف آف نیول اسٹاف ایڈمرل نوید اشرف کو کیڈٹس نے سلامی پیش کی۔