پاکستان نے ایران و افغان سرحدوں کو مکمل طورپر بند کر دیا

🗓️ 5 مئی 2021

اسلام آباد(سچ خبریں)پاکستان میں کورونا کی صورتحال او ر اس کے پھیلاؤ کی روک تھام کے لئے  حکام نے پاک ایران وافغان بارڈر بند کرکے سرحدوں کو مکمل طور پر بند کردیا ہے، 5 مئی شام 6 بجے کے بعد افغانستان اور ایران کےمسافروں پرپابندی عائد ‏ہوگی۔

تفصیلات کے مطابق ملک میں کورونا پھیلاؤ روکنے کیلئے پاک ایران وافغان بارڈر بند کردیا گیا اور دونوں ممالک کی سرحدیں مکمل طورپر سیل کردی گئی ہیں، سرحدی حکام کا کہنا ہے کہ دونوں ممالک کی سرحدوں پر سیکیورٹی ہائی الرٹ ہے ، اندرون ملک داخلی خارجی راستوں کوبھی مکمل سیل کردیا گیا ہے۔

دوسری جانب فغانستان اور ایران سے پیدل آمد پر بھی عارضی پابندی عائد کی گئی ہے ، این سی او سی نوٹیفکیشن کے مطابق ایران اور افغان حکام کوپابندی سےآگاہ کردیاگیا ہے تاہم افغان ٹرانزٹ ٹریڈ اور کارگو کی گاڑیوں پرکوئی پابندی نہیں ہوگی۔

یاد رہے پاکستان نے کروناوائرس کے خطرات کے باعث زمینی راستوں سے افغانستان اور ایران سے پاکستان آنے پر ‏عارضی پابندی عائد کر لی تھی ، نوٹیفیکیشن میں کہا گیا تھا کہ ایرانی ‏اور افغانی باشندوں پر پابندی 5 سے 20 مئی تک برقرار رہےگی۔

نوٹیفکیشن کے مطابق 5 مئی شام 6 بجے کے بعد افغانستان اور ایران کےمسافروں پرپابندی عائد ‏ہوگی البتہ مسافروں کے پاکستان سے ایران اور افغانستان جانے پر کوئی پابندی نہیں ہو گی، ایران اور افغانستان میں موجودپاکستانی شہری واپس آسکیں گے، ‏افغان شہریوں کوانتہائی ضروری طبی امدادکیلئےپاکستان آنےکی اجازت ہوگی۔