پاکستان نے افغانستان کے ساتھ جنگ بندی غیر مؤثر قرار دیدی

?️ 29 نومبر 2025

اسلام آباد: (سچ خبریں) پاکستان نے افغانستان کے ساتھ جنگ بندی غیر مؤثر قرار دیدی۔ دفترِ خارجہ کے ترجمان طاہر اندرابی کے مطابق افغانستان کے ساتھ موجودہ جنگ بندی قائم نہیں رہی، یہ جنگ بندی روایتی طور پر دو لڑائی میں مصروف ممالک کے درمیان نافذ نہیں کی گئی تھی بلکہ اس کا مقصد یہ تھا کہ افغان سرزمین سے دہشتگرد پاکستان میں حملے نہ کریں لیکن اس جنگ بندی کے بعد بھی بڑے پیمانے پر دہشتگردانہ حملے ہوئے، اس لیے کہا جا سکتا ہے کہ یہ جنگ بندی مؤثر نہیں رہی، پاکستان کی فوجی تیاری مضبوط ہے اور جو بھی سیکیورٹی چیلنجز آئیں گے انہیں سنجیدگی کے ساتھ حل کیا جائے گا۔

انہوں نے کہا کہ تاجکستان میں دہشتگرد حملے کے بعد طالبان حکومت نے کچھ عناصر پر الزام لگایا ہے جو خطے میں عدم استحکام پیدا کرنے کی کوشش کر رہے ہیں، یہ عناصر افغان سرزمین پر موجود ہیں اور چونکہ طالبان دعویٰ کرتے ہیں کہ اِن کے پاس پورے ملک پر کنٹرول ہے اس لیے انہیں ان عناصر پر قابو پانا چاہیئے جب کہ پاکستان میں داعش کی موجودگی کی کوئی حقیقت نہیں، یہ دعویٰ افسانوی ہے اور افغان طالبان کی طرف سے دہشتگردی کے مسئلے کو پاکستان کی طرف دھکیلنے کی کوشش ہے۔

ترجمان فارن آفس کا کہنا ہے کہ پاکستان، چین اور تاجکستان کے ساتھ دہشتگردی کے خلاف تعاون جاری رکھے ہوئے ہے اور شنگھائی تعاون تنظیم کے پلیٹ فارم پر بھی مل کر کارروائی کی جا رہی ہے، اس طرح کے مشترکہ اقدامات کو مزید بڑھانے کی ضرورت ہے کیونکہ دہشتگردی قومی اور بین الاقوامی سطح پر بڑھ رہی ہے جب کہ بھارت کی جانب سے انڈس واٹرز ٹریٹی کے تحت ڈیٹا شیئرنگ کے اصولوں کی خلاف ورزی پر تشویش ہے، بھارتی اقدامات بین الاقوامی قانون اور انسانی قوانین کی خلاف ورزی کے مترادف ہیں اور پانی کو ہتھیار کے طور پر استعمال کرنے کی نشاندہی کرتے ہیں۔