لاہور (سچ خبریں)معاون خصوصی اطلاعات پنجاب ڈاکٹر فردوس عاشق اعوان کا کہنا ہے کہ کورونا کا خطرہ ابھی ٹلا نہیں ہے کوروناکی چوتھی لہر سے بچاؤ کیلئے عوام کو زیادہ احتیاط کرنا ہوگی، پابندیوں سے بچنے کے لئے احتیاط لازمی ہے۔
فردوس عاشق اعوان نے کہا کہ کورونا ایس او پیز پر عمل اور ماسک لگانا انتہائی ضروری ہے، احتیاط کا راستہ کورونا کی چوتھی لہر سےمحفوظ رکھ سکتا ہے۔انہوں نے کہا کہ بےاحتیاطی اور ایس او پیزکی خلاف ورزی سے کیس پھر سے بڑھیں گے، ملک اور عوام پھر سے لاک ڈاؤن جیسی پابندیوں کےمتحمل نہیں ہوسکتے۔فردوس عاشق اعوان نے کہا کہ پابندیوں سے بچنےکیلئے شہری احتیاط کا دامن مت چھوڑیں۔
دوسری جانب کووِڈ 19 کی چوتھی لہر کے خطرے کے تناظر میں حکومتِ پنجاب کو کورونا ویکسینیشن کا عمل میں سست روی، ائیر پورٹ پر مسافروں کی مناسب اسکریننگ کے فقدان جیسے مسائل کا سامنا ہے۔ذرائع کے مطابق پنجاب ہیلتھ سروسز کے ڈائریکٹر جنرل ہارون جہانگیر نے ضلعی صحت انتظامیہ کو ہدایت دی ہے کہ کورونا وائرس کی چوتھی لہر سے بچنے کے لیے کاروباری شعبوں پر خاص توجہ دیں ۔
انہوں نے کہا کہ حکومت کی جانب سے تمام اضلاع کو ویکسین کی بلا تعطل فراہمی کی یقین دہائی کروائی گئی ہے، ساتھ ہی تشویش کا اظہار کیا کہ متعدد اضلاع ویکسین کی پہلی خوراک کے یومیہ ہدف سے بہت پیچھے ہیں۔ہارون جہانگیر کا کہنا تھا کہ ضلعی کمشنرز کی اتفاق رائے سے پہلے ہی ویکسینیشن کا ہدف مقرر کردیا گیا تھا، پنجاب جو کہ پاکستان کی 50 فیصد آبادی پر مشتمل صوبہ ہے، یہاں ویکسینیشن نا ہونے پر کورونا وائرس کی چوتھی لہر کا خطرہ تیزی سے بڑھ رہا ہے۔
انہوں نے تمام نجی اداروں کے ملازمین، بشمول دکاندار، اور جو افراد مارکیٹوں، ہوٹلز، ریسٹورینٹس، ڈھابوں، بس اڈوں اور ریلوے اسٹیشنز پر کام کررہے ہیں، ان کی ویکسینیشن کی تجویز دی۔ڈی جی ہیلتھ نے تمام اضلاع میں ابلاغ عامہ کی بھرپور مہم چلانے پر زور دیا ہے، جس میں اعلانات، بینرز اور مقامی رہنماؤں پر مشتمل بورڈز شامل ہیں۔