اسرائیل کا الصمود بیڑے پر حملہ دہشت گردی اور بین الاقوامی قوانین کی سنگین خلاف ورزی ہے:ترکی

 اسرائیل کا الصمود بیڑے پر حملہ دہشت گردی اور بین الاقوامی قوانین کی سنگین خلاف ورزی ہے:ترکی

 ترکی کی وزارتِ خارجہ نے اسرائیلی بحریہ کی جانب سے الصمود بیڑے پر حملے کو شدید الفاظ میں رد کرتے ہوئے اسے دہشت گردانہ اقدام اور بین الاقوامی قوانین کی کھلی خلاف ورزی قرار دیا ہے۔

رپورٹ کے مطابق، وزارتِ خارجہ نے اپنے بیان میں کہا کہ یہ حملہ بے گناہ شہریوں کی جانوں کو خطرے میں ڈالنے کے مترادف ہے اور انسانی حقوق و قوانینِ بین‌الملل کی صریح خلاف ورزی ہے۔

بیان میں مزید کہا گیا کہ انقرہ نے فوری طور پر اپنے شہریوں اور دیگر ممالک کے ان باشندوں کی رہائی کے لیے اقدامات شروع کر دیے ہیں جو کشتیوں کی ضبطگی کے دوران گرفتار کیے گئے۔ ترکیہ اس سلسلے میں تمام قانونی راستے اختیار کرے گا تاکہ اسرائیلی ذمہ داروں کو کٹہرے میں لایا جا سکے اور اپنے شہریوں کی جلد آزادی ممکن بنائے۔

ترکی نے اقوامِ متحدہ اور عالمی اداروں سے مطالبہ کیا کہ وہ فوری طور پر مداخلت کریں، غزہ کا محاصرہ ختم کریں اور انسانی امداد کی محفوظ ترسیل اور بحری راستوں کی آزادی کو یقینی بنائیں۔ وزارتِ خارجہ نے خبردار کیا کہ اس طرح کے حملے جنگ بندی اور امدادی سرگرمیوں کے لیے جاری عالمی کوششوں کو خطرے میں ڈال سکتے ہیں۔

بیان میں اسرائیلی وزیراعظم بنیامین نیتن یاہو کی پالیسیوں کو فاشسٹ اور عسکریت پسندانہ قرار دیتے ہوئے کہا گیا کہ غزہ پر مسلط سخت محاصرہ اور قحط صرف فلسطینی عوام ہی کو متاثر نہیں کرتا بلکہ ہر اس شخص کے لیے خطرہ ہے جو اسرائیلی ظلم کے خلاف آواز بلند کرے۔وزارتِ خارجہ نے امید ظاہر کی کہ یہ واقعہ غزہ میں جنگ بندی کے قیام کی کوششوں کو ناکام نہیں کرے گا۔

اناطولی کے مطابق، الصمود بیڑے نے اپنے سوشل میڈیا اکاؤنٹ پر اطلاع دی کہ اس پر تقریباً 10 اسرائیلی جنگی کشتیوں نے حملہ کیا۔ بیڑے نے بعد ازاں ہنگامی مدد کی اپیل کرتے ہوئے اس کارروائی کو جنگی جرم” قرار دیا۔

دریں اثناء، بین الاقوامی کمیٹی برائے خاتمہ محاصرہ غزہ نے بھی تصدیق کی کہ اسرائیلی بحریہ نے بیڑے کی متعدد کشتیوں پر قبضہ کیا ہے۔ یہ بیڑہ مجموعی طور پر 50 کے قریب کشتیوں پر مشتمل تھا جو محاصرہ توڑنے کے مقصد سے غزہ کی جانب بڑھ رہا تھا۔