اسلام آباد(سچ خبریں) وفاقی وزیر تعلیم و پاکستان تحریک انصاف (پی ٹی آئی) کے رہنما شفقت محمود کورونا وائرس سے شفایاب ہوگئے۔شفقت محمود نے کہا کہ معمولی علامات اور جلد صحتیابی بلاشبہ ویکسی نیشن کے باعث ممکن ہوئی ہے۔ شفقت محمود 25 مئی کو کورونا وائرس کا شکار ہوئے تھے۔
سماجی رابطے کی ویب سائٹ پر ٹوئٹ میں شفقت محمود نے کہا کہ ‘اللہ کے کرم سے میں مکمل صحتیاب ہوگیا ہوں اور میرے دو حالیہ کورونا ٹیسٹ منفی آگئے ہیں جس کے بعد آج سے کام پر واپس جارہا ہوں’۔
انہوں نے کہا کہ ‘معمولی علامات اور جلد صحتیابی بلاشبہ ویکسی نیشن کے باعث ممکن ہوئی ہے، یہ واضح ہے کہ ویکسینز کام کر رہی ہیں اور خطرناک بیماری کے خلاف بہترین دفاع ہے’۔واضح رہے کہ شفقت محمود 25 مئی کو کورونا وائرس کا شکار ہوئے تھے۔
ٹوئٹر پر ان کا کہنا تھا کہ ‘میرا کورونا وائرس کا ٹیسٹ مثبت آگیا ہے، میں معمولی علامات کے ساتھ بہتر محسوس کر رہا ہوں، انشااللہ جلد صحتیاب ہوجاؤں گا’۔وائرس کی تشخیص سے ایک روز قبل شفقت محمود نے بین الصوبائی وزرائے تعلیم کمیٹی کے 29ویں اجلاس کی صدارت کی تھی جس میں رواں سال 20 جون کے بعد ملک بھر میں امتحانات کے انعقاد جبکہ گرمیوں کی چھٹیاں محدود تعداد میں دینے کا فیصلہ کیا گیا تھا۔
اجلاس میں تمام صوبائی وزرائے تعلیم بشمول آزاد کشمیر و گلگت بلتستان اور متعلقہ سیکریٹریز نے شرکت کی تھی۔مارچ میں وفاقی وزیر نے ٹوئٹ کے ذریعے بتایا تھا کہ انہوں نے اسلام آباد کے پولی کلینک میں کورونا ویکسین لگوالی ہے۔خیال رہے کہ صدر مملکت ڈاکٹر عارف علوی اور وزیر اعظم عمران خان سمیت متعدد وفاقی وزرا اور سیاست دان کورونا سے متاثر ہونے کے بعد مکمل صحتیاب ہو چکے ہیں۔
