وزیر اعظم نے جسٹن ٹروڈو کو مبارکباد پیش کی

?️ 22 ستمبر 2021

اسلام آباد (سچ خبریں) انتخابات میں کامیابی پر کینیڈین وزیراعظم جسٹن ٹروڈو کو وزیراعظم عمران خان نے مبارکباد پیش کی اورملاقات میں باہمی تعلقات کو مزید مستحکم بنانے کے لئے مل کر کام کرنے کیلئے عزم کا اظہار کیا۔ جسٹن ٹروڈو  نے مسلسل تیسری بار کینیڈا کے انتخابات میں کامیابی حاصل کی۔

تفصیلات کے مطابق وزیراعظم عمران خان نے سماجی رابطے کی ویب سائٹ ٹوئٹر پر کینیڈامیں انتخابات جیتنے پر جسٹن ٹروڈوکومبارکباد دیتے ہوئے کہا باہمی تعلقات کومزیدمضبوط بنانے کیلئے مل کر کام کرنے کیلئے پر عزم ہیں۔

خیال رہے جسٹن ٹروڈو نے مسلسل تیسری بار کینیڈا کےانتخابات میں کامیابی حاصل کی، مگر اس بار وہ واضح اکثریت حاصل کرنے میں ناکام رہے۔ کینیڈا میں ہونے والے انتخابات میں حکمراں جماعت نے 156 اضلاع میں کامیابی حاصل کی جبکہ اپوزیشن جماعت 122 اضلاع سے کامیاب قرار پائی۔

واضح رہے کہ بعد ازاں جسٹن ٹرڈو نے اپنی کامیابی کا اعلان سماجی رابطے کی ویب سائٹ ٹویٹر کے ذریعے کرتے ہوئے عوام کا شکریہ ادا کیا اور قوم کے نام جاری اپنے پہلے پیغام میں کہا کہ کرونا سے نمٹنے اور خوش حال دنوں کے لیے لبرلز کے ترقی پسند منصوبے کا انتخاب کرنے والے عوام کی توقعات ہر ہم پورا اترنے کی کوشش کریں گے۔