اسلام آباد(سچ خبریں) وزارت داخلہ نے نواز شریف کے پاسپورٹ کی تجدید کی درخواست پر کاروائی نہ کرنے پر زور دیا ہے، وزارت داخلہ نے سیکریٹری وزارت خارجہ کو خط میں کہا ہے کہ نوازشریف اعلان شدہ اور مفرور مجرم ہیں ، ان کے پاسپورٹ کی تجدید کی درخواست پر کارروائی نہ کی جائے۔
تفصیلات کے مطابق وزارت داخلہ نے سیکریٹری وزارت خارجہ کو خط لکھا ، جس میں کہا ہے کہ نوازشریف کے پاسپورٹ کی تجدید کی درخواست پر کارروائی نہ کی جائے ، ہائیکورٹ کے مطابق نوازشریف اعلان شدہ مجرم ہیں۔
خط میں کہا گیا ہے کہ نیب کےریفرنسز میں بھی نوازشریف اعلان شدہ اور مفرور مجرم ہیں ، نوازشریف جب تک عدالت میں پیش نہیں ہوتے مزیدریلیف نہیں دیاجاسکتا۔وزارت داخلہ کا کہنا ہے کہ ہائی کورٹ کے مطابق نوازشریف کو 8ہفتے کی ضمانت ملی تھی ، پنجاب حکومت نے 8 ہفتے مکمل ہونے کے بعد ضمانت میں توسیع نہیں کی تھی۔
خط کے متن میں کہا کہ نوازشریف کو سزا کی بقیہ مدت کوٹ لکھپت جیل میں گزرنی ہے، وہ سزا سے بچنے کیلئے ملک سے فرار ہوئے ، ان کیخلاف اسلام آبادہائی کورٹ میں3 کیسز اور نیب میں ایک ریفرنس ہے، نوازشریف مطمئن نہ کرسکے کہ ان کا پاسپورٹ مزید کیوں رینیو کیاجائے۔
وزارت داخلہ کی جانب سے خط میں کہا گیا کہ نوازشریف واپس آنے چاہیں تو ایمرجنسی ٹریول کیلئے درخواست دے سکتے ہیں ، پاکستانی ہائی کمیشن نوازشریف کو تحریری جواب دیں کہ پاسپورٹ رینیو نہیں ہوسکتا۔
