ملک میں مہنگائی کی شرح بڑھ کر19.53 فیصد ہوگئی ہے

?️ 4 فروری 2022

اسلام آباد (سچ خبریں) ملک میں مہنگائی کی شرح بڑھ کر19.53 فیصد ہوگئی ہے رواں ہفتے مہنگائی کی شرح میں1.35 فیصد اضافہ ہوا، سب سے کم آمدنی والوں کیلئے مہنگائی 21.46 فیصد تک ہوگئی ہے۔ ادارہ شماریات کی مہنگائی پر ہفتہ وار رپورٹ کے مطابق ملک میں مہنگائی میں پھر اضافہ ہوگیا ہے۔

رواں ہفتے میں مہنگائی میں 1.35 فیصد اضافہ دیکھا گیا، جس کے بعد مہنگائی کی مجموعی شرح بڑھ کر19.53 فیصد ہوگئی ہے، اسی طرح سب سے کم آمدن والے افراد کیلئے مہنگائی کی شرح 21.46 فیصد کی سطح پر پہنچ گئی ہے۔

ادارہ شماریات کی رپورٹ میں بتایا گیا کہ رواں ہفتے 22 اشیاء کی قیمتوں میں اضافہ ہوا ہے، حالیہ ہفتے 6 اشیاء کی قیمتوں میں کمی اور23 اشیاء کی قیمتوں میں استحکام رہا۔ مہنگی ہونے والی اشیاء میں ٹماٹراوسط 70 روپے 94 پیسے فی کلو سے قیمت بڑھ کر 149 روپے 65 پیسے فی کلو ہوگئی ہے، جبکہ زندہ مرغی اوسط 19 روپے 33 پیسے فی کلو مہنگی ہوکر203 روپے 39 پیسے فی کلو ہوگئی، لہسن 17 روپے 80 پیسے فی کلو، سرسوں کے تیل کی قیمیت میں 9 روپے 19 پیسے فی کلو اضافہ ہوا۔

ایل پی جی کا گھریلو سلنڈر 35 روپے 87 پیسے، آٹے کا20 کلو کا تھیلا3 روپے 32 پیسے سمیت دودھ، دہی، مٹن، بیف، دال مسور، دال چنا، کیلے اور انرجی سیور بھی مہنگے ہوگئے ہیں۔ اسی طرح سستی ہونے والی اشیاء میں آلو2 روپے 45 پیسے فی کلو، پیاز ایک روپے 40 پیسے فی کلو، انڈے فی درجن 6 روپے 5 پیسے اور چینی 76 پیسے فی کلو سستی ہوگئی ہے۔دوسری جانب عالمی مالیاتی ادارے آئی ایم ایف نے کہا کہ پاکستان میں مہنگائی میں اضافہ ہو رہا ہے اورکرنٹ اکاؤنٹ خسارہ بڑھ رہا ہے،حکومت کے کیے گئے حالیہ اقدامات معیشت اور قرضوں کے استحکام کے لیے مناسب ہیں ،معاشی اصلاحات سے روزگار کے نئے مواقع پیدا ہوں گے۔

آئی ایم ایف نے اپنی رپورٹ میں کہا کہ کورونا کی پہلی لہر کے بعد معاشی سرگرمیاں بحال ہورہی ہیں جبکہ پاکستان میں مہنگائی میں اضافہ ہو رہا ہے اورکرنٹ اکاؤنٹ خسارہ بڑھ رہا ہے، حکومت کے کیے گئے حالیہ اقدامات معیشت اور قرضوں کے استحکام کے لیے مناسب ہیں ،معاشی اصلاحات سے روزگار کے نئے مواقع پیدا ہوں گے۔