معرکہ حق کے بعد معرکہ ترقی کیلئے ملکر کردار ادا کرنا ہوگا۔ احسن اقبال

?️ 19 اکتوبر 2025

نارووال (سچ خبریں) وفاقی وزیرِ منصوبہ بندی احسن اقبال نے کہا ہے کہ معرکہ حق کے بعد معرکہ ترقی کیلئے ملکر کردار ادا کرنا ہوگا۔

نارووال میں سڑک کی تعمیر کی افتتاحی تقریب سے خطاب کرتے ہوئے احسن اقبال کا کہنا تھا کہ آج پوری دنیا میں پاکستان کی معیشت کی بحالی کے چرچے ہیں، بانی پی ٹی آئی کی غلط پالیسیوں کی بدولت پاکستان ڈیفالٹ ہونےکے قریب تھا۔

اُنہوں نے کہا کہ مسلح افواج نے بھارتی جارحیت کا منہ توڑجواب دیا، وزیراعظم اور فیلڈ مارشل کی بہترین حکمت عملی سے معرکہ حق میں عظیم فتح ملی، افغانستان سے ہونے والی جارحیت کا بھی منہ توڑ جواب دیا گیا۔

احسن اقبال کا کہنا تھا کہ ہمیں اپنے شہدا پر فخر ہے، مسلح افواج نے دہشت گردی کے خلاف جنگ میں بے پناہ قربانیاں دیں، معرکہ حق کے بعد معرکہ ترقی کی کامیابی کے لیے سب کو اپنا کردار ادا کرنا ہوگا۔

وفاقی وزیر منصوبہ بندی نے مزید کہا کہ نوجوانوں کی فلاح وبہبود کے لیے کوشاں ہیں، ملک انتہا پسندی اور فساد کا متحمل نہیں ہوسکتا۔