مری (سچ خبریں) محکمہ موسمیات نے شمالی علاقہ جات میں اگلے ہفتے دوبارہ برف باری اور خراب موسم کی پیش گوئی کی ۔ محکمہ موسمیات کے مطابق منگل کی رات سے جمعرات کے دوران مری،گلیات،ناران،چترال،دیر،سوات،گلگت بلتستان اور وادی نیلم میں برفباری کی پیشگوئی کی گئی ہے۔ برفباری کے امکان کے پیش نظر پی ڈی ایم اے خیبرپختونخواہ کی جانب سے ضلعی انتظامیہ اور متعلقہ اداروں کو اس حوالے سے مراسلہ بھی ارسال کر دیا گیا۔
ڈی جی پی ڈی ایم اے کی جانب سے ضلعی انتظامیہ اور متعلقہ اداروں کو پیشگی اقدامات کی ہدایات کی گئی ہے اور لنک روڈزکی بحالی کے لیے مشینری کی دستیابی یقینی بنانے کا کہا گیا ہے۔ جبکہ پی ڈی ایم اے نے سیاحوں کو دوران سفر احتیاطی تدابیراختیار کرنے کی بھی ہدایت کی ہے۔واضح رہے کہ محکمہ موسمیات کی جانب سے جاری بیان کے مطابق ملک کے بالائی اضلاع میں بارش اور برفباری کے باعث لینڈ سلاڈینگ کا خدشہ ہے۔
محکمہ موسمیات نے منگل سے بدھ تک دیر،مالاکنڈ،ہزارہ،سوات،کوہستان،بلتستان اور کشمیرمیں لینڈ سلائیڈنگ کا خدشہ ظاہر کیا ۔ این ڈی ایم اے کے مطابق لینڈ سلائیڈنگ کے خدشے کے پیش نظر ان علاقوں میں الرٹ جاری کر دیا گیا ہے۔
راولپنڈی اوراسلام آباد سمیت لاہور،گجرات،ناروال،نوشہرہ،پشاور،باجوڑ، وزیرستان، کوہستان، مانسہرہ،ایبٹ آباد،صوابی اور مردان میں بارش اوربرفباری کا امکان ہے۔ اس کے علاوہ منگل سے بدھ تک کوئٹہ، زیارت،پشین،ژوب،قلعہ عبداللہ،کوہلو اور بارکھان میں بارش و برفباری کا امکان ہے۔ محکمہ موسمیات کی جانب سے جاری بیان میں مزید کہا گیا کہ حالیہ بارشیں گندم کی فصلوں کے لئے فائدہ مند ثابت ہوں گی۔
