قومی سلامتی پالیسی کا اجراء اہم سنگ میل ہے:ترجمان پاک فوج

?️ 29 دسمبر 2021

راولپنڈی (سچ خبریں) پاکستان فوج کے ترجمان میجر جنرل بابر افتخار نے کہا ہے کہ قومی سلامتی پالیسی کا اجراء اہم سنگ میل ہے، مسلح افواج پالیسی میں دیے وژن کے حصول کیلئے بھرپور کردار ادا کرے گی۔حکومت نے عالمی صورتحال دیکھتے ہوئے نئی قومی سلامتی پالیسی تشکیل دی۔

تفصیلات کے مطابق ڈی جی آئی ایس پی آر میجر جنرل بابر افتخار نے ٹویٹر پر اپنے بیان میں کہا کہ قومی سلامتی پالیسی کا اجراء اہم سنگ میل ہے، پاکستان کی قومی سلامتی مضبوط بنانے کیلئے نئی قومی پالیسی بہت اہم ہے۔حکومت نے عالمی صورتحال دیکھتے ہوئے قومی سلامتی پالیسی تشکیل دی، جامع فریم ورک قومی سلامتی کے مختلف پہلوؤں میں باہمی روابط کو تسلیم کرتا ہے۔

قومی سلامتی پالیسی ابھرتے چیلنجز سے نمٹنے کیلئے ناگزیر ہے۔ مسلح افواج پالیسی میں دیے وژن کے حصول کیلئے بھرپور کردار ادا کرے گی۔ واضح رہے وزیراعظم عمران خان کی زیرصدارت اجلاس میں وفاقی کابینہ نے ملک کی پہلی ’قومی سلامتی پالیسی‘ کی منظوری دے دی ہے۔

قومی سلامتی کے مشیر معید یوسف نے ٹویٹر پر اپنے ٹویٹ میں کہا کہ قومی سلامتی پالیسی کی منظوری تاریخی کامیابی ہے، عوام پر مبنی جامع پالیسی جس کا بنیادی مقصد اقتصادی تحفظ ہے، اس پر اب پوری تندہی سے عملدرآمد کیا جائے گا۔ انہوں نے کہا کہ پالیسی، جسے ابھی تک عوام کے سامنے نہیں لایا گیا، ملک کی قومی سلامتی کے مقاصد کی تکمیل کے لیے شعبہ جاتی پالیسیوں کی رہنمائی میں مدد کرے گی۔ معید یوسف نے سول اور عسکری قیادت کا ان کی حمایت اور معاونت پر شکریہ ادا کرتے ہوئے کہا کہ یہ پالیسی وزیراعظم عمران خان کی مستقل قیادت اور حوصلہ افزائی کے بغیر کبھی منظر عام پر نہیں آتی۔