فواد چوہدری کی مریم نواز پر شدید تنقید

?️ 24 نومبر 2021

اسلام آباد (سچ خبریں) وفاقی وزیر اطلاعات فواد چوہدری مریم نوازکو شدید تنقید کا نشانہ بناتے ہوئے کہا ہے کہ مریم نواز نے بڑے چینلز کے اشتہارات کنٹرول کرنےکا اعتراف کیا، یہ سنگین مالی بے ضابطگیوں کا ایک اور  اعتراف ہے امید ہے مریم اشتہارات کنٹرول کرنےکی طرح بیرون ملک جائیدادوں کا اعتراف بھی کرلیں گی۔

ٹوئٹر پر ایک بیان میں فواد چوہدری کا کہنا تھا کہ مریم نواز کہتی ہیں کہ وہ پارٹی کا میڈیا سیل چلارہی تھیں، اس اعترافی بیان کے بعد امید ہے وہ اپنی اور خاندان کی بیرون ملک جائیدادوں کا اعتراف بھی کر لیں گی، قوم چشم براہ ہے۔

خیال رہے کہ سوشل میڈیا پر ایک آڈیو وائرل ہورہی ہے جس میں مریم نواز کسی کو کہہ رہی ہیں کہ چار چینلزکو کوئی اشتہار نہیں جائےگا۔آج اسلام آباد میں پریس کانفرنس کرتے ہوئے مریم نواز  نے اعتراف کیا کہ یہ ان کی ہی آواز ہے۔

ایک سوال کے جواب میں مریم نواز کا کہنا تھا کہ میں انکار نہیں کر رہی کہ یہ آڈیو میری نہیں، یہ پرانی آڈیو ہے، میں تب پارٹی کا میڈیا سیل چلا رہی تھی، وہ بہت پرانی ہے، میں یہ نہیں کہہ رہی کہ فلاں تقریر سے یا توڑ جوڑ کر بنائی گئی ہے۔