غیر ملکیوں کی ویکسینیشن سے متعلق حکومت کا عمر کی حد میں کمی کا فیصلہ

🗓️ 26 اپریل 2021

اسلام آباد(سچ خبریں) ملک بھر میں  کورونا کی تشویشناک صورتحال اور  کیسز میں اضافے کے باعث وفاقی حکومت نے غیر ملکی شہریوں کی ویکسینیشن کے لئے اہم فیصلہ کیا ہے تاہم غیر ملکیوں کی ویکسینیشن کےلیےعمر کی حد ان کی سہولت کے لئے ساٹھ سے پچاس سال کر دی گئی ہے۔

ذرائع کے مطابق حکومت نے غیر ملکیوں کی ویکسینیشن کیلئےعمر کی حد میں کمی کا فیصلہ، کیا ہے، اسی تناظر میں غیر ملکیوں کی ویکسینیشن کےلیےعمر کی حد ساٹھ سے پچاس سال کر دی گئی ہے،عمر کی حد میں کمی کا فیصلہ غیر ملکیوں کی سہولت کیلئے کیا گیا ہے۔

ذرائع کا کہنا ہے کہ غیر ملکیوں کی کورونا ویکسینیشن کاحکم نامہ پانچ اپریل کو جاری ہوا تھا، فیصلے سے پاکستان میں مقیم غیر ملکی ہیلتھ ورکرز، شہری مستفید ہونگے تاہم پچاس سال سےزائد عمر کےغیر ملکی کرونا ویکسینیشن کراسکیں گے۔

دوسری جانب این سی او سی نے کرونا کے بڑھتے کیسز کو روکنے کے لئے چالیس سال سے زائد افراد کی ویکسی نیشن کی رجسٹریشن کرنے کا فیصلہ کیا ہے، سماجی رابطے کی ویب سائٹ ٹوئٹر پر جاری اپنی بیان میں این سی او سی کے سربراہ اسد عمر نے کہا کہ اگر آپ 40 سال یا اس سے اوپر کے ہیں تو رجسٹریشن کرالیں، 50 سال سے اوپر کے افراد کی واک ان ویکسین کل سے شروع ہوگی۔

نیشنل کمانڈ اینڈ آپریشن سینٹر نے گزشتہ روز کے اعداد و شمار جاری کرتے ہوئے کہا ہے کہ ملک میں 24 گھنٹوں میں کرونا کے مزید 70 مریض انتقال کر گئے ہیں۔این سی او سی کا کہنا ہے کہ ملک میں کرونا انفیکشن سے انتقال کرنے والوں کی مجموعی تعداد 17 ہزار 187 ہو گئی ہے، جب کہ ملک میں 8 لاکھ 452 پازیٹو کرونا کیس سامنے آ چکے ہیں۔