عمران خان ساتھیوں کی رائے سے اتفاق کریں تو مذاکرات ہوسکتے ہیں۔ سعد رفیق

?️ 2 جولائی 2025

لاہور (سچ خبریں) پاکستان مسلم لیگ ن کے سینئر رہنما خواجہ سعد رفیق کا کہنا ہے کہ عمران خان سینئر ساتھیوں کی راۓ سے اتفاق کریں تو مذاکرات شروع ہو سکتے ہیں۔

تفصیلات کے مطابق سوشل میڈیا پلیٹ فارم پر اپنے پیغام میں خواجہ سعد رفیق کا کہنا تھا کہ کوٹ لکھپت جیل میں قید پی ٹی آئی کے سینئر رہنماؤں کا سیاسی جماعتوں کے بیچ مذاکراتی عمل کی حمایت میں خط اہمیت کا حامل ہے۔ انہوں نے کہا کہ اگر بانی پی ٹی آئی اپنے سینئر ساتھیوں کی رائے سےاتفاق کریں توبات چیت شروع ہو سکتی ہے، محرم کے بعد بھی احتجاجی تحریک کامیاب نہیں ہو سکتی، موسم کی شدت، پی ٹی آئی کا نہایت کمزور تنظیمی ڈھانچہ اور اندرونی گروپنگ، ریاستی اداروں کا ایکا متوقع احتجاجی تحریک کی ناکامی کی بڑی وجوہات ہیں۔

ذرائع کے مطابق مسلم لیگ ن کے سینئر رہنما کا کہنا تھا کہ مکالمے کے ذریعے تلخی میں کمی لانے اور محاذ آرائی بتدریج کم کرنے کے طریقوں پر بغیر پیشگی شرائط بات چیت ہونی چاہیے، پاکستان کو نئے اور وسیع تر میثاق جمہوریت کی ضروت ہے، اس پر اتفاق رائے حاصل کیے بغیر کوئی بات چیت نتیجہ خیز نہیں ہو سکتی۔

خواجہ سعد رفیق نے کہا کہ حکومت اور اپوزیشن میں موجود سیاسی قوتیں مقبولیت کے پیمانے بدلتے رہنے کے باوجود سیاسی حقیقت ہیں، اسی طرح اسٹیبلشمنٹ کی طاقت سے انکار بھی حقیقت سے انکار ہے۔

ان کا مزید کہنا تھا کہ اختلافات اور پیچیدہ مسائل کا حل جو بھی نکلا مرحلہ وار ہی ہوگا، ایک دوسرے کو گھسیٹنے اور رگڑنے میں توانائی خرچ کرنے کے بجاۓ ملک کو آگے لے جانے کے طریقوں پر بات ہونی چاہیے۔