عالمی مارکیٹ میں پٹرولیم مصنوعات کی قیمتوں میں اضافہ،پاکستان میں قیمتیں کم کر دی گئیں

🗓️ 1 مارچ 2022

اسلام آباد ( سچ خبریں )  وزیر اعظم عمران خان نے 28 فروری کو قوم سے خطاب کرتےہوئے پٹرولیم مصنوعات کی قیمتوں میں 10روپے کمی کا اعلان کیا جس سے عوام کو یقیناً ایک بڑا ریلیف ملے گا جبکہ  روس اور یوکرائن جنگ کی وجہ سے عالمی مارکیٹ میں تیل کی قیمتیں 8 سال کی بلند ترین سطح پر پہنچ گئی ہیں ۔

نجی ٹی وی  کے مطابق عالمی مارکیٹ میں تیل کی قیمتیں 8 سال کی بلند ترین سطح پر پہنچ چکی ہیں ، برطانوی برینٹ خام تیل کی فی بیرل قیمت میں 3.17 ڈالر کا اضافہ ہوا جس کے بعد فی بیرل قیمت 101ڈالر سے تجاوز کر گئی۔

امریکی ڈبلیو ٹی آئی خام تیل کی فی بیرل قیمت میں 4.12 ڈالرز کا اضافہ ہواجس کے بعد فی بیرل قیمت 95.75 ڈالر پر پہنچ گئی۔

واضح رہے کہ متحدہ عرب امارات میں تیل کی قیمت میں 11 فیصد اضافہ کیا گیا ہے ،  اضافے کے بعد یو اے ای میں پہلی بار ایک لیٹر فیول کی قیمت 3 درہم سے زائد ہوگئی،  امارات میں آج سے سپر فیول فی لیٹر 3.23 درہم یعنی 154 پاکستانی روپے میں ملے گا۔

واضح رہے کہ روس اور یوکرائن کی جنگ کی وجہ سے عالمی مارکیٹ میں پٹرولیم مصنوعات کی قیمتیں اپنی بلند ترین سطح پر پہنچ چکی ہیں جبکہ  وزیر اعظم  پاکستان عمران خان  نے پٹرولیم مصنوعات میں 10 روپے تک کمی کر کے عوام کو ایک بڑا ریلیف دیا کیونکہ پٹرولیم مصنوعات کے بڑھنے سے ہر چیز کی قیمت بڑھتی ہے اور کم ہونے سے مختلف اشیاء کی قیمتوں میں کمی واقع ہوتی ہے۔

پاکستان میں چند روز پہلے پٹرولیم مصنوعات میں 12 روپے اضافہ ہوا تھا جسکی وجہ سے پٹرول کی قیمت 160 روپے تک پہنچ گئی تھی جسکی وجہ سے عوام میں شدید مایوسی پائی جاتی تھی اس کمی کی وجہ سے عوام کو کافی حد تک ریلیف ملے گا۔