عالمی برداری ایران، اسرائیل جنگ بندی کیلئے فوری کردار ادا کرے، وزیراعظم شہباز شریف

?️ 18 جون 2025

اسلام آباد: (سچ خبریں) وزیراعظم شہباز شریف نے کہا ہے کہ عالمی برداری ایران، اسرائیل جنگ بندی کیلئے فوری کردار ادا کرے، ایران، اسرائیل جنگ خطے اور عالمی امن کیلئے خطرناک ہے، اسرائیل نے پاکستان کے برادر ملک کے خلاف کھلی جارحیت کی ہے، اس جارحیت کے نتیجے میں سیکڑوں لوگ شہید ہوگئے ہیں، وفاقی کابینہ کے خصوصی اجلاس سے خطاب کرتے ہوئے وزیراعظم کا کہنا ہے کہ پاکستان نے ایران پر اسرائیل کی کھلی جارحیت کی بھرپور مذمت کی ہے۔

پاکستان خطے میں امن واستحکام چاہتا ہے۔اسرائیل کی جانب سے ایران پر حملے میں سینکڑوں ایرانی ابھی بھی زخمی ہیں اور جنگ جاری ہے۔ ایران اور اسرائیل کے درمیان صورتحال انتہائی تشویشناک ہے جس کی پاکستان بھرپور مذمت کررہا ہے۔

انہوں نے کہا کہ جس دن یہ جنگ شروع ہوئی اسی روز ایران کے صدر مسعود پزشکیان اور ترکیہ کے صدر رجب طیب اردوان سے بات ہوئی۔

ایرانی صدر کے ساتھ پاکستانی عوام کی طرف سے یکجہتی کا اظہار کیا۔ایران کے صدر سے گفتگو میں پاکستان کی طرف سے مکمل یک جہتی کا اظہار کیا۔ اسرائیل نے پاکستان کے برادر ملک کے خلاف کھلی جارحیت کی ہے اس جارحیت کے نتیجے میں سینکڑوں لوگ شہید ہوگئے ہیں جبکہ سینکڑوں ابھی بھی زخمی ہیں اور جنگ ابھی بھی جاری ہے۔وفاقی کابینہ سے خطاب کرتے ہوئے وزیراعظم شہباز شریف نے ایران میں جنگ ختم ہونے کی امید ظاہر کرتے ہوئے کہا کہ یہ جنگ صرف خطے کیلئے ہی نہیں بلکہ عالمی امن کیلئے بھی خطرناک ہے۔

وزیراعظم نے کابینہ اجلاس میں یہ بھی بتایا کہ آئندہ مالی سال کے بجٹ پر پارلیمنٹ میں بحث جاری ہے۔ زراعت پر کوئی ٹیکس نہیں لگایا گیا۔ زرعی شعبے کی ترقی کیلئے اقدامات ترجیح ہیں۔ بجٹ میں تنخواہوں میں 10 فیصد اضافہ کیا گیا۔ تنخواہ دار طبقے کو ٹیکس میں ریلیف دیا گیا ہے۔ 6 سے 12 لاکھ آمدن پر ٹیکس ایک فیصد کرنے کا فیصلہ کیا ہے۔ان کا یہ بھی کہنا تھا کہ بلاول بھٹو کی سربراہی میں پاکستانی وفد نے امریکہ اور یورپ میں بھرپور نمائندگی کی، قومی مؤقف اجاگر کرنے کیلئے پاکستانی وفد کی کاوشیں قابل ستائش ہیں۔

وزیراعظم شہباز شریف کا یہ بھی کہنا تھا کہ افواج پاکستان نے قوم کی حمایت سے دشمن کے خلاف کامیابی حاصل کی۔ دہشت گردی کے مکمل خاتمے کیلئے پر عزم ہیں۔ سکیورٹی اداروں کی تمام ضروریات پوری کریں گے۔ سرکاری شعبے کا ترقیاتی پروگرام ایک ہزار ارب روپے کا ہے۔ سخت محنت سے معیشت استحکام کی راہ پر گامزن ہے۔ 2023 میں مشکل حالات کا سامنا کرتے ہوئے ملک کو دیوالیہ ہونے سے بچایا۔