شوکت ترین کو سینیٹر بنانے کیلئے راہ ہموار ہوگئی

🗓️ 20 اکتوبر 2021

اسلام آباد(سچ خبریں) ایوب آفریدی نے سینیٹ کی نشست سے استعفی دے دیا ہے جس کے بعد شوکت ترین کے لئے سینیٹر بننے کی راہ ہموار ہوگئی ہے، حکومت نے مشیر خزانہ شوکت ترین کو سینیٹر بنانے کا فیصلہ کیا ہے جس کے لیے تحریک انصاف کے سینیٹر ایوب آفریدی کو مستعفی ہونا پڑا ہے۔

ذرائع کا بتانا ہے کہ شوکت ترین کو خیبر پختونخوا سے سینیٹر بنوایا جائے گا۔ذرائع کا کہنا ہے کہ خیبر پختونخوا سے پاکستان تحریک انصاف کے سینیٹر ایوب آفریدی نے اپنی نشست سے استعفیٰ بھی دے دیا ہے۔ذرائع کے مطابق سینیٹر شپ سے استعفیٰ دینے والے ایوب آفریدی کو وزیراعظم کا مشیر برائے سیفران بنایا جائے گا۔

دوسری جانب وزیراعظم عمران خان سے چیئرمین سینیٹ صادق سنجرانی اور اسپیکر قومی اسمبلی اسد قیصر کی ملاقات ہوئی ، ملاقات میں سینیٹرایوب آفریدی بھی موجود تھے۔ ذرائع نے کہا سینیٹرایوب آفریدی نے وزیراعظم عمران خان کو استعفیٰ پیش کیا ، وزیراعظم عمران خان نے سینیٹر ایوب آفریدی کی خدمات کو سراہا۔ شوکت ترین کو خبیرپختونخوا سے جنرل نشست پر سینیٹربنایا جائے گا۔

یاد رہے دو روز قبل شوکت ترین کو مشیر خزانہ اور ریونیو مقرر کیا گیا تھا تاہم شوکت ترین کوبطوروفاقی وزیرکام جاری رکھنے کیلئےسینیٹر بنوانا قانونی تقاضا ہے ، آئین کیمطابق غیرمنتخب شخص کووفاقی وزیربننے کے6ماہ میں رکن پارلیمنٹ بننالازمی ہے۔