اسلام آباد(سچ خبریں) حکومت نے الیکشن میں دھاندلی سے بچنے کے لئے الیکٹرونک ووٹنگ مشین کا ماڈل تیار کر کے پیش کر دیا، اپوزیشن کو بھی مدعو کیا کہ آئیں مشین کا ماڈل دیکھیں اور سوالات ہیں تو بتائیں، حکومت ٹیکنالوجی کے ذریعے جواب فراہم کرے گی۔
وفاقی وزیر فواد چوہدری اور مشیر پارلیمانی امور بابر اعوان نے کہا کہ ہر الیکشن کے بعد دھاندلی کا الزام لگا کر رونا کوئی حل نہیں ہے، پیپلز پارٹی اور نون لیگ دونوں پرچی پارٹیوں کو کہتے ہیں پہلے آکر دیکھ تو لیں یہ ہےکیا۔
مسلم لیگ نون ، پاکستان پیپلز پارٹی کو اپوزیشن لیڈر یوسف رضا گیلانی کو دعوت دیتے ہیں، آئیں ماڈل دیکھیں، سوال اٹھائیے تاکہ حکومت ٹیکنالوجی کے ذریعے جواب فراہم کرسکے۔
مشیر پارلیمانی امور بابر اعوان نے بتایا کہ الیکٹرونک ووٹنگ مشین 4 حصوں پہ مشتمل ہے، پہلے مرحلے میں اپنا شناختی کارڈ مشین میں ڈال کر ویری فیکیشن کرائے ، پھر ووٹنگ کا حق حاصل کرے اور پھر پسندیدہ امیدوار کو مشین پہ لگے بٹن کو دبا کر ووٹ ڈال دیں۔
سب سے پہلے ووٹر کی ویری فیکیشن ہوتی ہے پھر اگلہ مرحلہ ووٹنگ کا، پھر ووٹر اپنی ہڈن سپیس میں جاتا ہے اور اپنے پسند کے امیدوار کو بٹن دبا کر ووٹ دیتاہے، ووٹر کے سامنے مشین پہ بیلیٹ پیپر پیپر پرنٹ ہوگا اور نیچے بیلیٹ باکس میں گر جائے گا۔
وفاقی وزیر فواد چوہدری نے آگاہ کیا کہ یہ الیکٹرونک ووٹنگ مشین انٹرنیٹ سے کنیکٹ نہیں ہوگی،ہر پولنگ بوتھ پر الیکٹرونک ووٹنگ مشین موجود ہوگی، مشین آپریٹ کرنا بہت آسان ہے، مشین میں بیٹری لگی ہے، بجلی کی ضرورت نہیں ہے۔
انہوں نے کہا کہ الیکشن کمیشن نے مشین کیلئے 36 شرائط دی تھیں، تمام پوری کردی گئی ہیں،الیکشن اصلاحات پر تمام جماعتیں بیٹھیں اور متفقہ فیصلہ کریں، کیونکہ پولنگ ہوجاتی ہے اور صبح تک نتیجہ نہیں آتا ہے۔وفاقی وزیر کا کہنا تھا کہ جتنی الیکشن کمیشن کی اس وقت لاگت آرہی ہے اتنی ہی ان مشینوں پہ بھی آئے گی۔
فواد چوہدری نے کہاکہ جو لوگ موبائل استعمال کرسکتے ہیں وہ اس مشین کو آرام سے چلالیں گے، ہم نے 49 ترامیم دی ہے، اپوزیشن اپنے مشورے دے، یہ کوئی حل نہیں کہ ہر الیکشن کے بعد روئیں۔
مشیر پارلیمانی امور بابر اعوان نے کہاکہ ہم سے پانچ گنا زائد آبادی والے ملک نے الیکشن نتائج کو قابل قبول بنالیا ہے، ہم اپوزیشن کو دعوت دیتے ہیں کہ آئیں ماڈل دیکھیں، آپ کے جو سوال ہیں وہ اٹھائیں تاکہ حکومت جواب دے سکے۔
بابر اعوان نے کہاکہ ہم نے دو اختیارات الیکشن کمیشن کو سونپ دیئے ہیں، ہم نے بیرون ملک مقیم پاکستانیوں کو ووٹ کا حق دیا ہے، لوگ پوچھتے تھے کہ کیا ٹیکنالوجی کے ذریعہ دھاندلی کو شکست دی جائے گی؟ ہم ٹیکنالوجی کے ذریعہ دھاندلی کو شکست دینے کی تقریب میں شریک ہیں۔
انہوں نے کہاکہ پاکستان کے انتخابی نظام کو شروع سے کینسر لاحق ہے، وزیراعظم کی ہدایت کے بعد آج ہم انتخابی نظام کا علاج لائے ہیں، ہم ٹیکنالوجی کے ذریعہ دھاندلی کو شکست دینا چاہتے ہیں۔
