بلوچستان کی بدامنی میں ملک دشمن عناصر ملوث ہیں، سرفراز بگٹی

?️ 7 ستمبر 2024

کوئٹہ: (سچ خبریں) وزیراعلٰی میر سرفراز بگٹی نے کہا ہے کہ بلوچستان کی بدامنی میں ملک دشمن عناصر ملوث ہیں، دہشت گردوں کو منطقی انجام تک پہنچائیں گے اور ریاست کی رٹ ہر صورت برقرار رکھی جائے گی۔

ڈان نیوز کے مطابق وزیراعلٰی بلوچستان میر سرفراز بگٹی نے پیپلزپارٹی کے رہنما سید نئیر حسین بخاری، صوبائی وزرا اور اراکین اسمبلی کے اعزاز میں تقریب منعقد کی۔

تقریب میں میر سرفراز بگٹی نے کہا کہ بلوچستان حکومت میں شامل اتحادی جماعتوں کو ساتھ لیکر چل رہے ہیں، بلوچستان کو درپیش چیلنجز سے نمٹنے کیلئے تمام سیاسی جماعتوں کو ساتھ لیکر چلنے کے لیے تیار ہیں۔

انہوں نے کہا کہ بلوچستان میں گورننس کی بہتری کیلئے کوشاں ہیں، گورننس، امن و امان اور موسمیاتی تبدیلی بڑے چیلنجز ہیں جب کہ تعلیم اور صحت ہماری اولین ترجیحات میں شامل ہیں۔

وزیر اعلٰی بلوچستان نے کہا کہ صدر آصف علی زرداری اور چیئرمین بلاول بھٹو زرداری بلوچستان کی ترقی چاہتے ہیں، پارٹی قیادت کی رہنمائی میں تعلیم اور صحت کے شعبوں میں نمایاں بہتری لائیں گے۔

اس موقع پر پیپلزپارٹی کے سینیٹر نئیر حسین بخاری نے کہا کہ وزیراعلٰی بلوچستان نے صوبے کی ترقی کے لیے جامع حکمت عملی مرتب کی ہے، بلوچستان کے حالات دیگر صوبوں سے مختلف ہیں تاہم صوبائی حکومت عوامی خدمت کے مشن پر گامزن ہے۔

انہوں نے مزید کہا کہ صوبائی حکومت عوام کی توقعات پر پورا اترے گی، پارٹی کے صوبائی وزرا، اراکین اسمبلی اور کارکن عوامی خدمت کے مشن میں وزیراعلٰی بلوچستان کے شانہ بشانہ محنت کریں۔