بجلی چوری میں ملک کی بڑی بڑی کمپنیاں بھی ملوث ہیں، وزیر توانائی کا انکشاف

?️ 10 جولائی 2025

اسلام آباد: (سچ خبریں) وفاقی وزیر توانائی اویس لغاری نے انکشاف کیا ہے کہ بجلی چوری میں ملک کی بڑی بڑی کمپنیاں بھی ملوث ہیں، گزشتہ سال 591 ارب روپے کے نقصانات تھے، بجلی کی تقسیم کار کمپنیوں کے نقصانات کم کرکے 399 ارب روپے پر لے آئے ہیں۔ اس حوالے سے انہوں نے کہا ہے کہ حکومت توانائی کے شعبے میں بہتری کیلئے کوشاں ہے، بجلی کی تقسیم کار کمپنیوں کی کارکردگی میں بہتری لائی گئی ہے، بجلی کی تقسیم کار کمپنیوں میں میرٹ پر بورڈز ممبران کی تعیناتی کی ہے۔

اویس لغاری کہتے ہیں کہ بہتری کے باعث بجلی کی تقسیم کار کمپنیوں کے نقصانات میں کمی آئی ہے، حکومتی کوششوں کے باعث شعبہ توانائی میں نمایاں کامیابیاں ملی ہیں، نقصانات کو کم کرکے 151 ارب روپے بچائے ہیں، گزشتہ سال 276 ارب روپے کی بجلی چوری کی گئی، ہم نے 100 ارب روپے کے نقصانات کو کم کرنے کا ہدف رکھا تھا، گزشتہ سال تمام ڈسکوز نے 315 ارب روپے ریکور نہیں کیے۔

وفاقی وزیر توانائی کا مزید یہ بھی کہنا ہے کہ ، بجلی چوری میں بڑی بڑی کمپنیاں ملوث ہیں، 591 ارب روپے کے نقصان پر وزیراعظم اور وفاقی کابینہ کو تشویش تھی تاہم ہم نے ٹیکس ادا کرنے والوں کے 191 ارب روپے بچائے، ہماری وزارت ڈسکوز کی ریکوریوں کو بہترکرنے کیلئے مزید اقدامات بھی کر رہی ہے، کچھ ڈسکوز بجلی چوری کی مد میں نمایاں کمی لائی ہیں۔

دوسری طرف ملک بھر کے صارفین کیلئے اچھی خبر ہے کہ ماہانہ ایڈجسٹمنٹ میں بجلی سستی کردی گئی ،نیپرا نے ماہانہ ایڈجسٹمنٹ میں بجلی کی قیمتوں میں کمی کے الگ الگ نوٹیفکیشنزجاری کردیئے،بجلی صارفین کو کمی کاریلیف جولائی کے بلوں میں ملے گا، جاری نوٹیفکیشن کے تحت کراچی کے لیے بجلی کی قیمت میں4 روپی3پیسے فی یونٹ کی کمی کردی گئی ،کراچی کے سوا باقی ملک کے لیے بجلی 5پیسے فی یونٹ سستی کی گئی ہے ، کے الیکٹرک کے لیے بجلی اپریل2025 کی ماہانہ ایڈجسٹمنٹ میں سستی کی گئی باقی ملک کیلئے مئی2025 کی ایڈجسٹمنٹ میں بجلی کی قیمت میں کمی کی گئی، کے الیکٹرک نے اپریل کی ایڈجسٹمنٹ میں 4 روپی69 پیسے فی یونٹ کمی کی درخواست کی تھی سی پی پی اے نے مئی کی ایڈجسٹمنٹ میں 10 پیسے فی یونٹ کا اضافہ مانگا تھا۔