اسلام آباد(سچ خبریں) معاون خصوصی برائے صحت ڈاکٹر فیصل سلطان نےعوام کو خبردار کرتے ہوئے کہا ہے کہ عوام ایس اوپیز اور سماجی فاصلے کا خیال رکھیں،ایس اوپیز پر عملدرآمد نہ کرنے کی صورت میں لاک ڈاؤن لگ سکتاہے، آج سے 40سال سےزائد عمر کے افرادکو کورونا ویکسین لگنا شروع ہے۔
تفصیلات کے مطابق معاون خصوصی برائے صحت ڈاکٹر فیصل سلطان نے اہم پریس کانفرنس کرتے ہوئے کہا کہ ایس اوپیز پرعملدرآمد کیلئے انتظامیہ کیساتھ افواج پاکستان معاونت کرے گی جبکہ این سی اوسی سے مختلف علاقوں کی علیحدہ تفصیلات بھی آرہی ہوتی ہیں، تفصیلات سے واضح ہوتاہےایس اوپیز پر عملدرآمد ہورہاہے یا نہیں۔
ڈاکٹر فیصل سلطان کا کہنا تھا کہ این سی اوسی کی تفصیلات سے ہیلتھ کیئر سیکٹرپردباؤ کا بھی اندازاہوتاہے، جہاں ایس اوپیز پر عملدرآمد نہیں ہوگا تو وہاں لاک ڈاؤن لگ سکتاہے۔معاون خصوصی نے کہا کہ ہم ساتھ ساتھ میڈیکل ہیلتھ سیکٹر کی استعداد کار بھی بڑھارہےہیں اور مختلف ممالک سے امپورٹ بھی ممکن ہے اس پر بھی غورہورہاہے جبکہ پاکستان اسٹیل کے آکسیجن پلانٹ کابھی انجینئرز جائزہ لے رہے ہیں۔
ان کا کہنا تھا کہ کورونا کیسز میں اضافےپر مردان میں لاک ڈاؤن لگادیا ہے جبکہ آکسیجن کےاستعمال کیلئےاین سی اوسی،وزارت صحت آج گائیڈلائنزجاری کرے گی۔کوروناویکسین کے حوالے سے ڈاکٹر فیصل نے بتایا کہ کوروناویکسین کا استعمال شفاف طریقے سے جاری ہے یہ بالکل غلط ہے کہ حکومت عطیہ کی گئی ویکسین پر انحصار کررہی ہے۔
ان کا کہنا تھا کہ پاکستان نے30مارچ سے 30لاکھ ویکسین ڈوزز خریدی ہیں اور 3کروڑ کورونا ویکسین کی ڈوزز کی ڈیل کی جاچکی ہے جبکہ 17لاکھ ویکسین کی ڈوزز چین کی طرف سے عطیہ کی گئی تھیں۔معاون خصوصی نے کہا کہ دنیا بھرمیں ویکسین کی طلب زیادہ ہونےکیساتھ کمی کا بھی سامنا ہے ، چاہےجتنامرضی پیسہ ہوکوروناویکسین دستیاب نہیں توایک چیلنج ہوتاہے، ملک بھر میں 1200کورونا ویکسین سینٹرز فعال ہیں ، آج کی تاریخ تک 20لاکھ سےزائد ڈوزز لگ چکی ہیں۔
کورونا ویکسینیشن سے متعلق ان کا کہنا تھا کہ ملک بھر میں ویکسین کا عمل تیزی سے جاری ہے ، کل سے 50سال سےزائدعمر کے لوگ واک ان ویکسین لگواسکتےہیں، ویکسین سینٹرز کی تفصیلات این سی اوسی کی ویب سائٹ پر موجود ہے۔ڈاکٹرفیصل سلطان نے بتایا کہ کوروناویکسین سینٹرز جمعہ کو بند اور اتوا رکو کھلے ہوتےہیں، آج سے 40سال سےزائد عمر کے افرادکو کورونا ویکسین لگنا شروع ہے۔
