اومیکرون کے پھیلاو کی وجہ سے ہوائی اڈوں پر سختی سے جانچ کی جارہی ہے

?️ 20 دسمبر 2021

کراچی (سچ خبریں) تفصیلات کے مطابق سول ایوی ایشن اتھارٹی کی جانب سے جاری بیان میں بتایا گیا کہ سی اے اے کو برطانیہ سے پاکستان آنے والی پروازوں سے متعلق نئی ہدایات موصول ہوئی ہیں، پروازوں کے تمام مسافروں کے ایرپورٹس پر ریپڈ انٹیجن ٹیسٹ لازمی قرار دیا گیا ہے۔
ہدایت میں پابند کیا گیا کہ برطانیہ سے پاکستان آنے والی پروازوں کو ایڈجسٹ کیا جائے تاکہ ایرپورٹس پر تمام مسافروں کے ریپڈ انٹیجن ٹیسٹ مکمل کرلیے جائیں۔ سول ایوی ایشن کے مطابق ایک کے بعد دوسری پرواز میں اتنا وقت ہو تا ہےکہ پہلے سے آنے والی پرواز کے تمام مسافروں کے ریپڈ انٹیجن ٹیسٹ مکمل ہوجائیں۔

سول ایوی ایشن حکام کے مطابق اقدامات برطانیہ میں کورونا کے اومیکرون ویرینٹ کے تیزی سےسامنے آنے والے کیسز کے باعث کیے جارہے ہیں۔ خیال رہے کہ کورونا وائرس کی نئی قسم برطانیہ سمیت دنیا بھر میں تیزی سے پھیل رہی ہے۔ یاد رہے کہ گذشتہ ہفتے این سی او سی کے سربراہ اسد عمر نے اومی کرون کے پھیلاؤ کے پیش نظر عوام کو خبردار کیا تھا۔ نیشنل کمانڈ ایںڈ آپریشن سینٹر کے سربراہ اسد عمر نے مائیکروبلاگنگ ویب سائٹ ٹویٹر پر اپنے پیغام میں کہا کہ اومی کرون کےآتے ہی ویکسی نیشن کی ضرورت اور بھی بڑھ گئی ہے، اب تک8 کروڑ75 لاکھ پاکستانی کم ازکم ایک خوراک لے چکےہیں اور 6 کروڑافرادکومکمل طورپرویکسین لگائی جا چکی ہے۔