امریکی صدر ڈونلڈ ٹرمپ کے دورۂ پاکستان کا کوئی امکان نہیں، وزیردفاع

?️ 19 جولائی 2025

اسلام آباد: (سچ خبریں) وزیر دفاع خواجہ آصف کا کہنا ہے کہ امریکی صدر ڈونلڈ ٹرمپ کے دورہ پاکستان کا کوئی امکان نہیں۔ سیالکوٹ میں میڈیا سے گفتگو کرتے ہوئے وزیر دفاع خواجہ آصف نے تصدیق کرتے ہوئے کہا کہ امریکی صدر ڈونلڈ ٹرمپ کی جانب سے پاکستان کا دورہ کرنے کا کوئی پروگرام نہیں ہے۔

اس موقع پر انہوں نے مزید کہا کہ گلوبل وارمنگ میں پاکستان کا حصہ نہیں، گلوبل وارمنگ میں ترقی یافتہ ممالک کا حصہ ہے لیکن گلوبل وارمنگ کا زیادہ اثر چھوٹے ممالک پر پڑ رہا ہے، ہمیں جنگلات کو بڑھانا چاہیئے کیوں کہ گلیشئرز تیزی سے پگھل رہے ہیں اس لیے گلوبل وارمنگ کو روکنے کے لیے دنیا بھر میں کوشش ہونی چاہیئے۔

علاوہ ازیں وائٹ ہاؤس نے بھی امریکی صدر ڈونلڈ ٹرمپ کے دورۂ پاکستان کی میڈیا اطلاعات کی تردید کی، وائٹ ہاؤس حکام کا کہنا ہے کہ صدر ٹرمپ کا اس وقت پاکستان کے دورے کا کوئی شیڈول نہیں ہے جب کہ دوسری طرف خبررساں ادارے رائٹرز نے رپورٹ کیا ہے کہ امریکی صدر ٹرمپ 17 سے 19 ستمبر کر برطانیہ کا دورہ کریں گے، برطانوی رائل پیلس نے بھی تصدیق کی کہ امریکی صدر کنگ چارلس کی دعوت پر برطانیہ پہنچیں گے۔

اسی طرح ترجمان فارن آفس شفقت علی خان نے امریکی صدر ڈونلڈ ٹرمپ کے دورہ پاکستان کی خبروں پر لاعلمی کا اظہار کیا، اس حوالے سے انہوں نے کہا کہ باضابطہ طور پر ہمیں کوئی اطلاع موصول نہیں ہوئی کہ امریکی صدر ستمبر میں پاکستان کا دورہ کریں گے۔ 

بتایا جارہا ہے کہ حال ہی میں امریکی صدر سے ملاقات میں فیلڈ مارشل عاصم منیر نے ڈونلڈ ٹرمپ کو اس وقت دورہ پاکستان کی دعوت دی تھی جب امریکی صدر نے فیلڈ مارشل کے اعزاز میں وائٹ ہاؤس کے کیبنٹ روم میں ظہرانہ دیا تھا، ڈونلڈ ٹرمپ نے اس ملاقات میں بھارت سے جنگ روکنے پر فیلڈ مارشل کا شکریہ ادا کیا اور کہا تھا کہ فیلڈ مارشل عاصم منیرسے ملاقات کا اعزاز حاصل ہوا، عاصم منیر کی شخصیت متاثر کن ہے، ان کا شکریہ کہ وہ جنگ کی طرف نہیں گئے۔