اسد عمر نے قیمتوں میں حالیہ اضافے کوعالمی مسئلہ قرار دیا

?️ 18 اکتوبر 2021

اسلام آباد(سچ خبریں)وفاقی وزیر منصوبہ بندی اسد عمر نے اشیاء کی قیمتوں میں حالیہ   اضافے کو عالمی مسئلہ قرار دیتے ہوئے کہا ہے کہ  مہنگائی میں حالیہ اضافہ ملکی نہیں بلکہ عالمی مسئلہ ہے، پاکستان کی بنسبت دوسرے ممالک میں  لاک ڈاؤن کی وجہ سے قیمتوں میں زیادہ  اضافہ ہوا ہے۔جس میں انہوں نے امریکا، چین اور بھارت کی مثال پیش کی۔

اسلام آباد میں پریس کانفرنس کے دوران انہوں نے کہا کہ عالمی منڈیوں کی قیمت میں اضافہ ہوا کیونکہ طلب اور رسد کے فرق اور ترسیلات کے نظام میں کورونا کی وجہ سے رکاوٹ نے تمام شعبوں کو متاثر کیا۔

انہوں نے امریکا، چین اور بھارت کی مثال دیتے ہوئے کہا کہ ان ممالک میں ریکارڈ مہنگائی ہے جہاں کبھی مہنگائی کی شرح کا اتنا تصور کیا جا سکتا۔اسد عمر نے ورلڈ بینک کا ڈیٹا کا حوالے دیتے ہوئے کہا کہ گزشتہ 12ماہ کے دوران خام پٹرول کی قیمت 81.55 فیصد جبکہ پاکستان میں اسی عرصے میں 17.55 فیصد کا اضافہ ہوا۔

واضح رہے کہ پاکستان میں مہنگائی کا مسئلہ ان دنوں کافی زور پکڑے ہوئے ہیں عوام نے بھی اس پر اپنے ردعمل کا اظہار کیا اور آج وزیراعظم نے بھی اجلاس طلب کیا ہے جس میں عوامی مسائل پر گفتگو متوقع ہے۔