ٹوئٹر نے صارفین کے لئے ایک اور فیچر متعارف کرادیا

?️ 7 نومبر 2021

نیویارک(سچ خبریں) مائیکرو بلاگنگ ویب سائٹ ٹوئٹر نے صارفین کی سہولت کو مد نظر رکھتے ہوئے  اپنے اسپیس فیچر کو مزید بہتر بنانا شروع کر دیا ہے۔ اب ٹوئٹر پر اسپیس میں شامل ہونے کے لیے صارفین کے لاگ ان ہونے کی شرط کو ختم کردیا گیا۔

تفصیلات کے مطابق بین الاقوامی میڈیا میں کہا گیا ہے کہ اب ٹوئٹر پر اسپیس میں شامل ہونے کے لیے صارفین کے لاگ ان ہونے کی شرط کو ختم کردیا گیا۔ بغیر لاگ ان ہوئے اسپیس میں شامل ہونے والے اس میں حصہ نہیں  لے سکتے،صرف اسپیس میں موجود لوگوں کی گفتگو کو سن سکتے ہیں۔

یہی نہیں بلکہ میزبان اور سامعین کی آسانی کے لیے ٹوئٹر نے آسانی کردی ہے، اب میزبان اور سامعین کسی کو بھی اسپیسس آڈیو براڈکاسٹ کا براہ راست لنک بھیج سکتے ہیں۔

اگر آپ نے ٹوئٹر سے اکاؤنٹ کو ڈی ایکٹیویٹ کررکھا ہے تو بھی آپ اپنے ساتھیوں کی اسپیس کو جوائن کرسکتے ہیں۔صارفین کی جانب سے ٹوئٹر کی جانب سے دی گئی اس سہولت کا خیر مقدم کیا جارہا ہے۔ واضح رہے کہ صارفین کے سہولت کے لئے اس سے قبل بھی ٹویٹر  نے مختلف اقدام اٹھائے ہیں اور اب بھی اٹھائے جا رہے ہیں اور جدید فیچر صارفین کے لئے پیش کئے جاتے رہے ہیں۔