سام سنگ نے سستے ترین فونز متعارف کرا دیئے

?️ 13 اگست 2021

سیئول( سچ خبریں) ٹیکنالوجی کمپنی سام سنگ نے گزشتہ برس کے مقابلے میں کم قیمت پر جدید ترین ’فولڈ ایبل اسمارٹ فونز‘ متعارف کرادئیے ہیں۔جنہیں ستائیس اگست سے امریکا اور یورپ کی مارکیٹوں میں فروخت کے لیے پیش کیا جائے گا۔

میڈیا رپورٹ کے مطابق سام سنگ نے ’گلیکسی زی فولڈ تھری‘ اور ’گلیکسی زی فلپ تھری‘ متعارف کرائے ہیں جو ستائیس اگست سے امریکا اور یورپ کی مارکیٹوں میں فروخت کے لیے پیش کیے جائیں گے۔

کمپنی کی جانب سے گلیکسی زی فولڈ تھری کی قیمت ایک ہزار 799 ڈالرز مقرر کی گئی ہے جب کہ ’گلیکسی زی فلپ تھری‘ کی قیمت 999 ڈالرز ہوگی۔سام سنگ کے ان جدید ترین فولڈ ایبل اسمارٹ فونز کی خصوصیات پر نظر ڈالیں تو گلیکسی زی فولڈ تھری کی مین اسکرین 7.6 جب کہ گلیکسی زی فلپ تھری کی اسکرین 6.7 انچ پر مشتمل ہے۔

یہی نہیں فون میں کوالکوم کا اسنیپ ڈریگن 888 پروسیسر نصب ہے جب کہ اس میں 256 جی بی اور 512 جی بی اسٹوریج موجود ہے، گلیکسی زی فولڈ تھری میں دس میگا پکسل سیلفی کیمرا جب کہ چار میگا کا پکسل انڈر ڈسپلے کیمرا موجود ہے جب کہ فون کی پشت پر بارہ میگا پکسل کے الٹرا وائیڈ، وائیڈ اینگل اور ٹیلی فوٹو کیمرا موجود ہیں۔