جی میل میں اے آئی ٹول متعارف

?️ 24 مارچ 2025

سچ خبریں: انٹرنیٹ ٹیکنالوجی کمپنی گوگل نے اپنی ای میل سروس جی میل میں آرٹیفیشل انٹیلی جنس (اے آئی) کا مزید ایک نیا ٹول متعارف کرادیا۔

گوگل کی جانب سے جاری بیان میں بتایا گیا کہ جی میل میں پرانی اور مطلوبہ ای میلز کو جلد اور بہتر انداز میں تلاش کرنے کا اے آئی فیچر پیش کردیا گیا۔

بیان میں بتایا گیا کہ اے آئی فیچر صارفین کو پرانی ای میلز جلد تلاش کرنے میں مدد فراہم کرے گا۔

فیچر نہ صرف صارف کو پرانی مطلوبہ ای میلز تلاش کرنے میں مدد فراہم کرے گا بلکہ وہ ملتی جلتی ای میلز بھی صارف کو تلاش کرکے دے گا۔

علاوہ ازیں اے آئی ٹول تلاش کیے گئے الفاظ کو نظر رکھتے ہوئے نہ صرف پرانی ای میلز کے نتائج فراہم کرے گا بلکہ کسی بھی ادارے یا شخص کی جانب سے آنے والی یا انہیں بھیجی جانے والی ای میلز کے نتائج بھی فراہم کرے گا۔

بیان میں بتایا گیا کہ جی میل پر پرانی ای میلز کو بہتر انداز میں تلاش کرنے کا اے آئی فیچر پیش کردیا گیا ہے، تاہم فوری طور پر تمام صارفین کو اس تک رسائی نہیں دی گئی۔

کمپنی کے مطابق ترتیب وار آنے والے دنوں میں تمام جی میل صارفین کو اے آئی سرچ ٹول تک رسائی دے دی جائے گی۔

مذکورہ ٹول سے قبل بھی جی میل نے ای میل میں ای میل لکھنے میں مدد دینے کا جیمنائی اے آئی ٹول بھی پیش کیا تھا، علاوہ ازیں جی میل میں متعدد اے آئی ٹولز پیش کیے جا چکے ہیں۔