صیہونیوں کا کا ڈاکٹر حسام ابوصفیہ کو رہا کرنے سے انکار

?️ 15 اکتوبر 2025

سچ خبریں:صیہونی حکام نے غزہ کے اسپتال کمال عدوان کے سربراہ ڈاکٹر حسام ابوصفیہ کی رہائی روک دی ہے۔

صہیونی ذرائع کے مطابق ان کی آزادی صیہونی وزیرِ جنگ اسرائیل کاتس اور قابض وزیراعظم نیتن یاہو کی منظوری سے مشروط ہے،ڈاکٹر ابوصفیہ شدید بیماریوں اور ناقابلِ برداشت قید کی حالت میں ہیں۔

یہ بھی پڑھیں:ایک نہتے انسان کا ٹینک کے ساتھ مقابلہ؛ دنیا کی انوکھی تصویر

رپورٹ کے مطابق صہیونی قابض حکام نے ڈاکٹر حسام ابوصفیہ، سربراہ اسپتال کمال عدوان غزہ، کو رہا کرنے سے انکار کر دیا ہے، حالانکہ وہ کسی بھی قانونی الزام کے بغیر طویل عرصے سے اسرائیلی جیل میں قید ہیں۔

صہیونی میڈیا کے مطابق، ابوصفیہ کی رہائی کو صہیونی وزیرِ جنگ اسرائیل کاتس اور قابض وزیراعظم بنیامین نیتن یاہو کی ذاتی منظوری سے مشروط کیا گیا ہے۔

ڈاکٹر ابوصفیہ کے وکیل غید قاسم نے ان کی انتہائی خراب صحت پر تشویش ظاہر کرتے ہوئے کہا کہ قید کے دوران انہیں صرف مہینے میں 30 منٹ کے لیے کھلی ہوا میں جانے کی اجازت دی جاتی ہے۔
انہوں نے مزید بتایا کہ ڈاکٹر ابوصفیہ کا ایک تہائی وزن کم ہو چکا ہے اور وہ شدید جلدی امراض میں مبتلا ہیں۔

وکیل کے مطابق، ڈاکٹر ابوصفیہ کا آخری پیغام یہ تھا کہ میں انسانیت کے لیے اس میدان میں داخل ہوا تھا، اور انسانیت کے نام پر ہی باہر نکلوں گا۔
انہوں نے کہا کہ میں وہی ہوں جسے اسپتال کے اندر سے اغوا کیا گیا، ہم اپنی سرزمین پر ثابت قدم رہیں گے اور خدا کی مدد سے اپنے لوگوں کی خدمت جاری رکھیں گے۔

یہ واقعہ ایسے وقت پیش آیا ہے جب غزہ میں جنگ بندی کے معاہدے کے تحت قیدیوں کا تبادلہ جاری ہے۔
گزشتہ روز حماس کی عسکری ونگ شہید عزالدین القسام بٹالین نے 20 اسرائیلی قیدیوں کو ریڈ کراس کے حوالے کیا۔

جواباً قابض صیہونی حکام نے 250 فلسطینی قیدیوں کو جن پر عمر قید یا سخت سزائیں تھیں اور 1817 دیگر قیدیوں کو غزہ پٹی سے رہا کیا۔

مزید پڑھیں: دنیا ہماری مدد کی درخواست پر توجہ نہیں دیتی: کمال عدوان ہسپتال کے ڈائریکٹر

تاہم انسانی حقوق کے کارکنان کا کہنا ہے کہ ڈاکٹر حسام ابوصفیہ جیسے کئی بے گناہ قیدی اب بھی صیہونی جیلوں میں سخت حالات کا سامنا کر رہے ہیں اور ان کی رہائی سیاسی فیصلوں کی نذر بنی ہوئی ہے۔