صہیونی حکومت کا فلسطینی قیدیوں کو مگرمچھوں سے خوفزدہ کرنے کا منصوبہ

?️ 17 جولائی 2026

سچ خبریں:رپورٹس کے مطابق صہیونی حکومت نے قانونی تبدیلیوں کے ذریعے نیل کے مگرمچھوں کو سکیورٹی مقاصد کے لیے استعمال کرنے کی راہ ہموار کر دی ہے۔ عبرانی ذرائع کے مطابق اس منصوبے کا آغاز نقب کی کتزیوت جیل سے کیا جا سکتا ہے۔

روسیہ الیوم کے مطابق، صہیونی حکومت نے ایک غیر معمولی اقدام کے تحت، جسے ناقدین نے انسانی حقوق کے اصولوں کے منافی قرار دیا ہے، نیتن یاہو کابینہ کی وزیر برائے ماحولیاتی تحفظ ایدیت سیلمان کے ذریعے نیل کے مگرمچھوں کی قانونی حیثیت کو خطرناک جنگلی جانور سے تبدیل کرکے پالتو جنگلی جانور قرار دینے کی منظوری دی، تاکہ انہیں سکیورٹی مراکز میں استعمال کرنے کی راہ ہموار کی جا سکے۔

رپورٹ کے مطابق، اس قانونی تبدیلی کے بعد صہیونی حکومت کے داخلی سلامتی کے وزیر ایتامار بن گویر کے لیے فلسطینی قیدیوں کی حراستی مراکز کے اطراف جنگلی جانوروں کے استعمال کے منصوبے پر عمل درآمد کا راستہ آسان ہو گیا ہے۔

عبرانی ذرائع ابلاغ میں شائع ہونے والی رپورٹس کے مطابق، اس منصوبے کا آزمائشی آغاز صحرائے نقب میں واقع کتزیوت جیل سے کیا جانا متوقع ہے۔ رپورٹ میں کہا گیا ہے کہ اس اقدام کا مقصد صرف سکیورٹی نہیں بلکہ فلسطینی قیدیوں پر نفسیاتی دباؤ بڑھانا اور ان کے حوصلے کو متاثر کرنا بھی ہے۔

 قانونی ترمیم کے بعد وہ سابقہ پابندیاں بھی ختم کر دی گئی ہیں جن کے تحت جنگلی جانوروں کا استعمال صرف سائنسی اور تعلیمی مقاصد تک محدود تھا، جس سے جیل انتظامیہ کو ایسے جانور استعمال کرنے کا اختیار مل گیا ہے۔

رپورٹ میں اس اقدام کو تل ابیب میں برسر اقتدار سخت گیر حلقوں کی اس وسیع تر پالیسی کا حصہ قرار دیا گیا ہے جس کا مقصد فلسطینی قیدیوں کی حراستی صورتحال کو مزید سخت بنانا، ان کے بنیادی حقوق کو محدود کرنا اور ان پر غیر معمولی دباؤ ڈالنا ہے۔

بین الاقوامی مبصرین اور انسانی حقوق کی تنظیموں نے اس منصوبے کی مذمت کرتے ہوئے اسے صہیونی حکومت کے اخلاقی زوال کی علامت قرار دیا ہے۔

 ان کے مطابق، اگر عالمی ادارے اس معاملے پر خاموش رہے تو اسے انسانی حقوق کی بنیادی خلاف ورزیوں کے حوالے سے صہیونی حکومت کے اقدامات کی عملی تائید تصور کیا جائے گا۔