یمن کی سعودی نواز حکومت میں تبدیلی؛نئے وزیرِاعظم مقرر

سچ خبریں:سعودی عرب کی حمایت یافتہ یمنی صدارتی کونسل نے عدن میں قائم حکومت کے لیے سالم صالح بن بریک کو نیا وزیر اعظم مقرر کر دیا۔ احمد عوض بن مبارک نے سیاسی دباؤ اور کابینہ کی مخالفت کے باعث استعفیٰ دیا تھا۔

یمن کی سعودی عرب کی حمایت یافتہ صدارتی کونسل نے ہفتہ کی شب (3 مئی 2025) کو سالم صالح بن بریک کو عدن میں قائم حکومت کا نیا وزیر اعظم مقرر کرنے کا اعلان کیا، یہ تقرری احمد عوض بن مبارک کے استعفے کے بعد عمل میں آئی، جنہوں نے سیاسی دباؤ اور داخلی اختلافات کی وجہ سے اپنے عہدے سے کنارہ کشی اختیار کی۔

احمد عوض بن مبارک، جو فروری 2024 سے وزیر اعظم کے طور پر خدمات انجام دے رہے تھے، نے حکومت کے اندرونی اختلافات اور بڑھتے دباؤ کے پیش نظر رشاد العلیمی صدر صدارتی کونسل، کو اپنا استعفیٰ پیش کر دیا۔

یہ بھی پڑھیں:یمن میں جاری جنگ کا اصلی فاتح کون، یمنی عوام یا سعودی اتحاد؟

 ان کی برطرفی کے لیے کابینہ کے 18 وزرا نے متحدہ مطالبہ کیا تھا، ان کے استعفے کی وجوہات میں شدید معاشی بحران، سیاسی تناؤ، اور صدارتی کونسل کے ساتھ اختلافات شامل ہیں۔

سالم بن بریک 3 اپریل 1965 کو حضرموت کے شہر المکلا میں پیدا ہوئے۔ وہ مالیاتی اور گمرکی نظام میں وسیع تجربہ رکھتے ہیں، ستمبر 2019 سے وہ عدن میں قائم حکومت کے وزیر خزانہ کے طور پر کام کر رہے تھے۔

 اس سے قبل وہ کسٹم محکمے میں متعدد اعلیٰ عہدوں پر فائز رہ چکے ہیں، جن میں صدر مصلحت گمرک، اور الطوال، الحدیدہ، اور عدن فری زون کے گمرک ڈائریکٹر شامل ہیں۔

سالم بن بریک کی تقرری ایسے وقت میں ہوئی ہے جب عدن میں قائم حکومت کو شدید اقتصادی، سیاسی، اور سیکیورٹی بحرانوں کا سامنا ہے۔

سعودی عرب پر اس حکومت کا انحصار، اور صدارتی کونسل کا کردار، بن بریک کے لیے خودمختاری میں رکاوٹ بن سکتا ہے۔ انہیں نہ صرف اقتصادی بحالی، بلکہ کابینہ میں اتفاق رائے پیدا کرنے اور داخلی تنازعات کو سنبھالنے جیسے اہم مسائل کا سامنا ہو گا۔