سچ خبریں: یمنی مسلح افواج کے ترجمان نے بحیرہ احمر میں ایک امریکی آئل ٹینکر پر میزائل اور ڈرون حملے اور بحر ہند میں ایک اور بحری جہاز کو کروز میزائل سے نشانہ بنانے کی اطلاع دی ہے۔
المسیرہ نیوز ایجنسی کی رپورٹ کے مطابق یمنی مسلح افواج کے ترجمان نے بحیرہ احمر اور بحر ہند میں دو فوجی کارروائیوں کی تصدیق کی ہے۔
یہ بھی پڑھیں: یمن کے خلاف امریکی-برطانوی سازش کا انکشاف
یمنی مسلح افواج کے ترجمان یحیی سریع نے ایک ویڈیو بیان میں اعلان کیا کہ مظلوم فلسطینیوں اور لبنانیوں کی حمایت اور فلسطین اور لبنان کی مزاحمتی تحریکوں کی پشتیبانی کے لیے نیز امریکہ اور برطانیہ کی یمن پر جارحیت کے جواب میں یمنی مسلح افواج نے دو فوجی آپریشنز کیے ہیں۔
پہلے آپریشن میں بحیرہ احمر میں امریکی آئل ٹینکر (OLYMPIC SPIRIT) کو 11 بیلسٹک میزائلوں اور دو ڈرونز کے ذریعے براہِ راست نشانہ بنایا گیا، جس سے اسے شدید نقصان پہنچا، یہ مشترکہ کارروائی یمنی مسلح افواج کے میزائل اور ڈرون یونٹ نے انجام دی۔
دوسری کارروائی میں یمنی مسلح افواج کے میزائل یونٹ نے بحر ہند میں (ST. JOHN) نامی بحری جہاز کو ایک کروز میزائل سے براہِ راست نشانہ بنایا، کیونکہ اس جہاز کی مالک کمپنی نے فلسطین کے مقبوضہ علاقوں کی بندرگاہوں پر سفر کی پابندی کی خلاف ورزی کا ارادہ ظاہر کیا تھا۔
مزید پڑھیں: امریکی صدر کا مغربی ایشیا کی حالیہ صورتحال پر اظہار خیال
یمنی مسلح افواج کے ترجمان نے مزید کہا کہ صہیونی حکومت کا بحری محاصرہ جاری رہے گا نیز صہیونی مخالف کارروائیاں بھی جاری رہیں گی ، غزہ اور لبنان پر جارحیت ختم ہونے تک یہ آپریشنز روکے نہیں جائیں گے۔
