قطر میں صیہونی فوج آپریشن کیوں ناکام ہوا؟

سچ خبریں:قطر کے دارالحکومت دوحہ میں حماس کے دفتر پر اسرائیلی حملے کی ناکامی نے واضح کردیا ہے کہ یہ کارروائی عملاً صیہونی وزیرِاعظم بنیامین نیتن یاہو کے دفتر کے ذریعے فاش ہوئی۔

دوحہ میں حماس کی سیاسی قیادت کو نشانہ بنانے کے لیے اسرائیلی فضائی حملہ ناکام رہا، جسے عالمی سطح پر ایک بڑا انٹیلیجنس اور عسکری ناکامی قرار دیا جارہا ہے۔

یہ بھی پڑھیں:موساد نے قطر میں حماس رہنماؤں کے خلاف زمینی آپریشن کی منصوبہ بندی کی تھی

تاہم تازہ معلومات کے مطابق یہ ناکامی صرف عسکری یا انٹیلیجنس سطح تک محدود نہیں، بلکہ اسرائیل کے اندرونی سیاسی نظام میں جاری ایک بڑی کشمکش کا حصہ ہے۔

ذرائع کے مطابق نیتن یاہو کے دفتر نے یہ آپریشن دانستہ طور پر افشا کیا تاکہ موساد اور شاباک کی قیادت کو دباؤ میں لاکر ان اداروں میں تنظیمی صفائی کے لیے راہ ہموار کی جاسکے۔

یاد رہے کہ 18 ستمبر کو اسرائیل کے 12 جنگی طیاروں نے 10 میزائلوں سے دوحہ پر حملہ کیا، اس حملے میں کم از کم 10 افراد شہید ہوئے۔

اسرائیلی فضائیہ کا اصل ہدف حماس کے وہ سیاسی رہنما تھے جو جلاوطنی کے باعث دوحہ میں مقیم ہیں، اطلاعات کے مطابق ان میں سے بعض رہنما حملے میں محفوظ رہے۔

اسرائیل نے اس آپریشن کو یوم الحساب (Day of Reckoning) کا نام دیا، بمباری کے وقت حماس کی قیادت غزہ پر ممکنہ نئے جنگ بندی منصوبے پر غور کر رہی تھی۔

قطر نے اس حملے کی شدید مذمت کی اور اعلان کیا کہ وہ غزہ میں موجود صیہونی قیدیوں کی رہائی کے لیے جاری ثالثی سے دستبردار ہورہا ہے۔

مزید پڑھیں:حماس کا سیاسی مرکز دوحہ کے بعد کہاں ہوگا؟

واضح رہے کہ عالمی سطح پر بھی اس کارروائی کو شدید ردعمل کا سامنا کرنا پڑا۔ بیشتر عرب و اسلامی ممالک اور بین الاقوامی تنظیموں نے اسرائیلی حملے کو بین الاقوامی قوانین اور انسانی اصولوں کی سنگین خلاف ورزی قرار دے کر مذمت کی۔