امریکی عدالت کی جانب سے ٹرمپ کے تجارتی محصولات پر پابندی پر عائد

?️ 31 مئی 2025

سچ خبریں:امریکی عدالت نے ڈونلڈ ٹرمپ کو ایمرجنسی اختیارات کے تحت درآمدی محصولات عائد کرنے سے روک دیا، عدالت نے ان محصولات کو غیر قانونی اور مالیاتی عدم استحکام کا سبب قرار دیا۔

امریکہ کی ایک وفاقی عدالت نے سابق صدر ڈونلڈ ٹرمپ کو ہنگامی اختیارات کے تحت وسیع درآمدی محصولات عائد کرنے سے روک دیا ہے، جس سے ان کی متنازع اقتصادی پالیسیوں کو زبردست قانونی دھچکا لگا ہے۔

یہ بھی پڑھیں:انگریزی اشاعت: چین نے ٹرمپ کی تجارتی جنگ جیت لی

خبررساں ایجنسی ایسوسی ایٹڈ پریس کے مطابق، نیویارک میں قائم امریکی عدالت برائے بین‌المللی تجارت کے تین رکنی بینچ نے فیصلہ سنایا کہ ٹرمپ کی جانب سے عائد کردہ محصولات جنہیں انہوں نے یومِ آزادی ٹیرف کہا تھا،ان کے آئینی اختیارات سے تجاوز کرتے ہیں اور امریکہ کی تجارتی پالیسی کو ذاتی خواہشات کا نشانہ بناتے ہیں۔

عدالت نے اپنے فیصلے میں واضح کیا کہ ٹرمپ کی اقتصادی حکمت عملیوں نے عالمی مالیاتی منڈیوں میں غیر یقینی صورتحال پیدا کی، تجارتی شراکت داروں کو مایوس کیا، اور معیشت میں مہنگائی اور ممکنہ کساد بازاری کے خطرات کو بڑھاوا دیا۔

خبررساں ادارے روئٹرز نے بھی اس معاملے پر رپورٹ دی ہے کہ عدالت میں دائر کی گئی اس درخواست میں امریکہ کی 13 ریاستوں اور دیگر چھوٹے اقتصادی گروہوں نے بھی شرکت کی اور یہ چیلنج ٹرمپ کی محصولات پالیسی کے خلاف دائر کی گئی سات قانونی کارروائیوں میں سے ایک ہے۔

اس سے قبل بھی امریکی عدالتیں ٹرمپ کی پالیسیوں کو معطل کر چکی ہیں۔ حالیہ مثال میں ایک وفاقی جج نے اس پالیسی پر عبوری پابندی لگا دی تھی جس کے تحت ہارورڈ یونیورسٹی کو بین الاقوامی طلبہ کے داخلوں سے روکنے کی کوشش کی گئی تھی۔ ہارورڈ نے اسے علمی آزادی پر حملہ اور آئینِ امریکہ کی خلاف ورزی قرار دیا تھا۔

مزید پڑھیں:گارڈین: ٹرمپ کی تجارتی جنگ برازیل اور چین کو ایک دوسرے کے قریب لاتی ہے

اس عدالتی فیصلے کے بعد ہزاروں بین الاقوامی طلبہ، جنہیں دیگر جامعات میں منتقل ہونے کا خطرہ لاحق تھا، کو وقتی ریلیف حاصل ہوا،ہارورڈ نے خبردار کیا تھا کہ یہ پالیسی نہ صرف 7,000 سے زائد ویزا ہولڈرز کو متاثر کرے گی بلکہ تعلیمی ادارے کو فوری اور تباہ کن نتائج کا سامنا ہوگا۔