امریکہ کا ایران پر جنگ بندی کی خلاف ورزی کا الزام!

?️ 28 مئی 2026

سچ خبریں:امریکی فوج کی سینٹرل کمانڈ نے دعویٰ کیا ہے کہ ایران نے میزائل اور ڈرون حملوں کے ذریعے جنگ بندی کی خلاف ورزی کی ہے، جبکہ ایران نے خلیج فارس میں امریکی اشتعال انگیزی اور جوابی کارروائی کی تصدیق کی ہے۔

امریکی فوج کی سینٹرل کمانڈ (سینٹکام) نے حالیہ جھڑپوں کے حوالے سے دعویٰ کیا ہے کہ ایران نے جنگ بندی کی سنگین خلاف ورزی کی ہے۔

امریکی فوج کے مطابق ۲۷ مئی کو رات ۱۰:۱۷ بجے ایران نے کویت کی جانب ایک بیلسٹک میزائل فائر کیا، جسے کویتی فورسز نے کامیابی سے روک لیا۔

سینٹکام کے بیان میں مزید کہا گیا کہ یہ واقعہ اس وقت پیش آیا جب ایرانی فورسز نے پانچ یک طرفہ حملہ آور ڈرونز فائر کیے جو آبنائے ہرمز اور اس کے اطراف میں خطرہ بنے ہوئے تھے۔

امریکی دعوے کے مطابق ان ڈرونز کو امریکی فورسز نے روک لیا، جبکہ ایک چھٹے ڈرون کو بندر عباس کے قریب زمینی کنٹرول سائٹ سے لانچ ہونے سے بھی ناکام بنا دیا گیا۔

بیان میں مزید الزام لگایا گیا کہ ایران نے جنگ بندی کی سنگین خلاف ورزی کی ہے۔

دوسری جانب ذرائع ابلاغ کے مطابق گزشتہ رات آبنائے ہرمز اور مشرقی ہرمزگان کے علاقے میں دھماکوں کی آوازیں سنی گئیں، جو خلیج فارس میں ایرانی اور امریکی فورسز کے درمیان تبادلہ فائر اور فضائی دفاعی نظام کے فعال ہونے کا نتیجہ تھیں۔

رپورٹس کے مطابق کچھ امریکی بحری جہاز بغیر پیشگی اجازت آبنائے ہرمز سے گزرنے کی کوشش کر رہے تھے، جس پر ایرانی بحریہ نے بروقت اور سخت ردعمل دیا، جس کے بعد امریکی جہازوں کو پیچھے ہٹنا پڑا۔

ایران نے متعدد بار واضح کیا ہے کہ اس اسٹریٹجک آبی گزرگاہ سے گزرنے کے لیے ایرانی حکام سے ہم آہنگی ضروری ہے۔

ن واقعات کے بعد امریکی فورسز کی جانب سے ایک فوجی اڈے پر حملے کی اطلاعات بھی سامنے آئیں، جسے انہوں نے “دفاعی کارروائی” قرار دیا۔

پچھلے دو روز کے دوران خلیج فارس میں امریکی فوجی سرگرمیوں کے باعث کشیدگی میں اضافہ دیکھا گیا ہے۔

دوسری طرف اسلامی انقلابی گارڈز کور نے اعلان کیا ہے کہ امریکی فوج کی جانب سے بندر عباس کے قریب ایک مقام پر فضائی حملے کے جواب میں امریکی فوجی اڈے کو نشانہ بنایا گیا ہے۔

پاسداران انقلاب نے کہا ہے کہ یہ کارروائی ایک واضح انتباہ ہے کہ کسی بھی جارحیت کا جواب دیا جائے گا، اور آئندہ کسی بھی حملے کی صورت میں ردعمل مزید سخت ہوگا، جس کی تمام ذمہ داری جارح فریق پر ہوگی۔