ٹرمپ جلد غزہ میں جنگ بندی کا اعلان کریں گے؛صہیونی میڈیا کا دعویٰ

سچ خبریں:صہیونی ذرائع ابلاغ نے دعویٰ کیا ہے کہ امریکی صدر ڈونلڈ ٹرمپ آئندہ چند دنوں میں غزہ میں جنگ بندی اور قیدیوں کے تبادلے کا اعلان کر سکتے ہیں۔ 

الجزیرہ نیوز چینل کی رپورٹ کے مطابق صہیونی میڈیا نے دعویٰ کیا ہے کہ غزہ کی پٹی میں جاری جنگ اور انسانی بحران کے تناظر میں آئندہ چند روز میں جنگ بندی اور قیدیوں کے تبادلے کا اہم اعلان متوقع ہے۔

یہ بھی پڑھیں: بائیڈن کا غزہ میں تین مراحل پر مشتمل جنگ بندی اور قیدیوں کے تبادلے کی تجویز کا اعلان

رپورٹ مطابق، صہیونی چینل کان نے اپنی رپورٹ میں بتایا ہے کہ امریکی صدر ڈونلڈ ٹرمپ مذاکرات میں ہونے والی پیشرفت کے نتیجے میں بہت جلد غزہ میں آتش بس اور قیدیوں کے تبادلے کا اعلان کریں گے۔

صہیونی ٹی وی چینل 12 نے بھی رپورٹ کیا ہے کہ اسرائیلی مذاکراتی وفد آج قاہرہ روانہ ہو سکتا ہے،قاہرہ سے ملنے والی اطلاعات کے مطابق، مذاکرات کے عمل میں نمایاں بہتری آئی ہے اور مثبت پیش رفت دیکھی جا رہی ہے۔

دوسری جانب، فلسطینی نیوز ایجنسی معا نے ذرائع کے حوالے سے بتایا ہے کہ قطر کے دارالحکومت دوحہ میں ہونے والے مذاکرات میں بھی امید افزا علامات سامنے آئی ہیں،ذرائع کے مطابق، فریقین ایک نئے مجوزہ معاہدے پر غور کر رہے ہیں، جس کے تحت دو ماہ کی جنگ بندی کے عوض دس اسرائیلی قیدیوں کی رہائی کی پیشکش زیرِ غور ہے۔

اس صورتحال کے بعد خطے میں پائیدار امن کے قیام اور انسانی بحران میں کمی کی امید پیدا ہو گئی ہے،تجزیہ کاروں کے مطابق، اگر یہ معاہدہ طے پا جاتا ہے تو اس سے نہ صرف فوری جنگ بندی ممکن ہو سکے گی بلکہ قیدیوں کے تبادلے کے عمل میں بھی تیزی آئے گی، جو فریقین کے لیے بڑی پیش رفت تصور کی جائے گی۔

مزید پڑھیں: غزہ میں جنگ بندی کی نئی امریکی صیہونی تجویز

علاقائی اور عالمی سطح پر بھی اس معاہدے کو انتہائی اہم قرار دیا جا رہا ہے، کیونکہ اس کے نتیجے میں غزہ میں جاری تشدد کے خاتمے اور انسانی امداد کی راہ ہموار ہو سکتی ہے۔