ایران معاہدے پر ٹرمپ کا اجلاس بے نتیجہ ختم: نیویارک ٹائمز

?️ 30 مئی 2026

سچ خبریں:نیویارک ٹائمز کے مطابق امریکہ کے صدر ڈونلڈ ٹرمپ کا ایران سے معاہدے پر حتمی فیصلہ کرنے والا اجلاس دو گھنٹے بعد بغیر کسی نتیجے کے ختم ہو گیا، جبکہ فریقین کے درمیان اہم اختلافات بدستور برقرار ہیں۔

نیویارک ٹائمز نے ایک اعلیٰ امریکی حکومتی عہدیدار کے حوالے سے رپورٹ کیا ہے کہ ایران کے ساتھ معاہدے پر حتمی فیصلہ کرنے کے لیے امریکی صدر ڈونلڈ ٹرمپ کا اجلاس دو گھنٹے جاری رہنے کے بعد بغیر کسی نتیجے کے ختم ہو گیا۔

رپورٹ کے مطابق مذکورہ عہدیدار کا اصرار ہے کہ اگرچہ معاہدہ اب بھی قریب ہے، تاہم بعض اہم امور جیسے ایران کے منجمد اثاثوں کی بحالی پر اب بھی بات چیت جاری ہے۔

اس سے قبل ڈونلڈ ٹرمپ نے سوشل میڈیا پلیٹ فارم ٹروتھ سوشل پر اپنے مطالبات کا ذکر کرتے ہوئے کہا تھا کہ حتمی فیصلے کے لیے وہ سٹیٹ روم میں جائیں گے۔

ٹرمپ نے اپنے بیان میں دعویٰ کیا تھا کہ آبنائے ہرمز کو فوری طور پر کھولا جانا چاہیے اور بحری آمدورفت کے لیے کسی قسم کی فیس یا رکاوٹ نہیں ہونی چاہیے۔ انہوں نے یہ بھی کہا تھا کہ محاصرے میں شامل امریکی بحری جہاز ممکن ہے اپنے مشنز سے واپس لوٹنا شروع کریں۔

انہوں نے مزید دعویٰ کیا تھا کہ ایران کا افزودہ یورینیم نکال کر تباہ کیا جائے گا اور یہ کہ کسی بھی قسم کی مالی ادائیگی یا لین دین نہیں ہوگا، جس کا اشارہ منجمد ایرانی اثاثوں کی طرف تھا۔

دوسری جانب ایران کے داخلی ذرائع اور سرکاری میڈیا نے ان دعوؤں کو مسترد کر دیا ہے۔ ایرانی خبر ایجنسی فارس نے باخبر ذرائع کے حوالے سے کہا ہے کہ ٹرمپ کے بیانات میں حقیقت اور غلط معلومات کا امتزاج موجود ہے اور یہ دعویٰ کہ ایران کا افزودہ مواد تباہ کیا جائے گا، بے بنیاد ہے۔

اسی طرح ایران سے منسوب ذرائع نے یہ بھی کہا ہے کہ آبنائے ہرمز کو کسی بھی قسم کی فیس کے بغیر کھولنے کی شرط مسودہ معاہدے کا حصہ نہیں ہے۔

خبر رساں ادارے روئٹرز نے ایک ایرانی ذریعے کے حوالے سے رپورٹ کیا ہے کہ یہ دعویٰ بھی درست نہیں کہ ایران کا افزودہ یورینیم ملک سے باہر منتقل کیا جائے گا، اور یہ کہ ممکنہ یادداشت میں ایران کے جوہری پروگرام سے متعلق کوئی شق شامل نہیں ہے۔