خطے کی صورتحال تعطل کا شکار، ایران سے رابطے جاری ہیں: مصر

?️ 26 اگست 2026

سچ خبریں:مصر کے وزیر خارجہ بدر عبدالعاطی نے کہا ہے کہ خطے میں صورتحال نہ جنگ نہ امن کی کیفیت میں تعطل کا شکار ہے اور قاہرہ ایران سے مسلسل رابطے میں ہے۔

مصر کے وزیر خارجہ بدر عبدالعاطی نے ایران کے خلاف جنگ کا حوالہ دیتے ہوئے کہا ہے کہ خطے کی صورتحال تعطل کا شکار ہوگئی ہے۔

متحدہ عرب امارات کے نشریاتی ادارے نیشنل سے گفتگو کرتے ہوئے بدر عبدالعاطی نے کہا کہ ایک مسئلہ موجود ہے، جیسا کہ آپ جانتے ہیں، ہم اس وقت نہ جنگ نہ امن کی صورتحال میں ہیں۔

انہوں نے مزید کہا کہ حالات ایسے ہیں جیسے خطہ مکمل تعطل کا شکار ہوگیا ہو۔

مصر کے وزیر خارجہ نے کہا کہ قاہرہ ایرانی فریق کے ساتھ اپنے رابطے جاری رکھے ہوئے ہے۔ مصر فوری طور پر اس تنازع کے خاتمے کا خواہاں ہے اور اس کے لیے ایسے معاہدے کی حمایت کرتا ہے جس میں ایران کے جوہری پروگرام کا جائزہ، امریکی پابندیوں کا خاتمہ، آبنائے ہرمز کو دوبارہ کھولنا اور جنگ بندی شامل ہو۔

انہوں نے کہا کہ جون میں امریکہ اور ایران کے درمیان ہونے والا معاہدہ جنگ کے خاتمے کے لیے مذاکرات کی راہ ہموار کرنے کے مقصد سے کیا گیا تھا، تاہم گزشتہ ماہ یہ معاہدہ ناکام ہوگیا۔ اس معاہدے کے تحت پابندیوں میں کمی اور آبنائے ہرمز کو دوبارہ کھولنے کی توقع تھی، لیکن ان دونوں میں سے کوئی بھی پیش رفت نہیں ہوسکی۔

واضح رہے کہ ایران کے خلاف فوجی جارحیت ایسے وقت میں کی گئی جب ایران امریکہ کے ساتھ مذاکرات میں مصروف تھا۔ اسلامی جمہوریہ ایران متعدد بار واضح کرچکا ہے کہ وہ جنگ کو وسعت دینے کا خواہاں نہیں، تاہم امریکہ اور ٹرمپ حکومت کے غیرضروری مطالبات کے سامنے بھی ہتھیار نہیں ڈالے گا۔