فلسطینی عوام کا حق خود ارادیت ناقابل تردید ہے:عدالتی اعلامیہ

?️ 30 مئی 2025

سچ خبریں:غزہ ٹریبونل کے شرکاء نے بوسنیا کے دارالحکومت سارایوو میں فلسطینی عوام کے حق خود ارادیت اور مسلح مزاحمت کو اقوام متحدہ کی قراردادوں کی روشنی میں جائز قرار دیا، نسل کشی پر میڈیا کے کردار کی مذمت بھی کی گئی۔

خبررساں ادارے آناتولی کی رپورٹ کے مطابق، غزہ عدالت کا انعقاد بوسنیا و ہرزیگووینا کے دارالحکومت سارایوو میں کیا گیا، جہاں مختلف ممالک سے تعلق رکھنے والے انسانی حقوق کے ماہرین، وکلاء، دانشور اور سرگرم کارکنان شریک ہوئے۔

یہ بھی پڑھیں:بارود سے فلسطینیوں کی آواز دبائی نہیں جاسکتی، پاکستان نے ہمیشہ مسئلہ فلسطین کو اجاگر کیا، وفاقی وزیرقانون

سارایوو بوسنیا و ہرزیگووینا میں بین الاقوامی سطح پر منعقدہ غزہ عدالت کے شرکاء نے فلسطینی قوم کے حق خود ارادیت کو ایک مسلمہ، بنیادی اور ناقابل انکار حق قرار دیتے ہوئے زور دیا کہ یہ مسئلہ کسی بھی قسم کی بحث یا مفاہمت سے بالاتر ہے۔

اختتامی بیان میں کہا گیا ہے کہ ہم اقوام متحدہ کی جنرل اسمبلی کی منظور کردہ قراردادوں کی روشنی میں فلسطینی عوام کے اس حق کی توثیق کرتے ہیں کہ وہ تمام اقسام کی جدوجہد، بشمول مسلح مزاحمت، کے ذریعے اپنی آزادی اور خودمختاری کے لیے کوشش کریں۔

غزہ عدالت کے شرکاء نے عالمی میڈیا کے اس کردار پر شدید تحفظات کا اظہار کیا جو اسرائیلی جارحیت اور فلسطینی عوام پر ڈھائے جانے والے مظالم کو چھپانے یا کم کرنے کی کوشش کرتا ہے اعلامیہ میں کہا گیا کہ ہم ان میڈیا اداروں کے شرمناک کردار کی مذمت کرتے ہیں جو فلسطینی نسل کشی کو چھپانے اور متعصب پروپیگنڈا پھیلانے میں مصروف ہیں۔

اعلامیے میں واضح الفاظ میں کہا گیا کہ فلسطینی عوام کا حق خود ارادیت نہ صرف ناقابل انکار ہے بلکہ یہ ایک ایسا بنیادی انسانی حق ہے جو بین الاقوامی قانون کے تحت تسلیم شدہ ہے۔ اس پر کسی بھی صورت میں سوال یا سودا نہیں کیا جا سکتا۔

مزید پڑھیں:ایران کا مسئلہ فلسطین پر او آئی سی کا ہنگامی اجلاس بلانے کا مطالبہ، پاکستان نے حمایت کردی

شرکاء نے عالمی برادری سے مطالبہ کیا کہ وہ فلسطینیوں کے حق خود ارادیت کو تسلیم کرے، اسرائیلی مظالم کی مذمت کرے اور دوہرے معیار کا خاتمہ کرے۔ انہوں نے زور دیا کہ اقوام متحدہ اور عالمی ادارے فلسطینی قوم کے ساتھ انصاف کریں اور ان کے قانونی حقوق کی حمایت کریں۔