ٹرمپ کے متضاد بیانات پر روس کا ردعمل

سچ خبریں:روسی سلامتی کونسل کے نائب سربراہ دیمیتری مدودف نے کہا ہے کہ ماسکو کو امریکی صدر ڈونلڈ ٹرمپ کے غیرمستحکم اور متضاد بیانات پر توجہ دینے کے بجائے یوکرین میں اپنے فوجی اہداف پر توجہ مرکوز رکھنی چاہیے۔ مدودف کے مطابق، امریکہ کی سیاسی غیر یقینی کے باوجود روس کو اپنی سرزمین کی واپسی اور فتح کے لیے کوششیں جاری رکھنی چاہئیں۔

ٹاس خبر رساں ایجنسی کی رپورٹ کے مطابق، روسی سلامتی کونسل کے نائب سربراہ دیمیتری مدودف نے کہا ہے کہ ماسکو کو امریکی صدر ڈونلڈ ٹرمپ کے غیرمستحکم اور متضاد بیانات کو نظرانداز کرنا چاہیے اور یوکرین میں اپنے فوجی اہداف کے حصول پر توجہ دینی چاہیے۔

مدودف نے امریکی صدر ٹرمپ کے یوکرین سے متعلق بیانات اور حالیہ دنوں میں ان کی روسی صدر ولادیمیر پیوٹن سے گفتگو کا حوالہ دیتے ہوئے کہا کہ امریکی ایک بار پھر اپنے پسندیدہ سیاسی جھولے پر سوار ہیں۔

انہوں نے مزید کہا کہ سوال یہ ہے کہ ہمیں اس صورتحال سے کیسے نمٹنا چاہیے؟ بالکل ویسے ہی جیسے پہلے کرتے آئے ہیں اور جیسے ہمارے سپریم کمانڈر کرتے ہیں یعنی انہیں نظر انداز کریں۔ ہمیں اپنے ‘خصوصی فوجی آپریشن’ کے مقاصد کے حصول کے لیے کوشش جاری رکھنی چاہیے، اپنی سرزمین واپس لینی چاہیے اور فتح کے لیے کوشاں رہنا چاہیے۔

مزید پڑھیں:امریکہ نے یوکرین کو ہوائی دفاعی میزائل کی ترسیل روکی

مدودف کے مطابق، ٹرمپ نے حالیہ مہینوں میں یوکرین جنگ کے حوالے سے متضاد اور بدلتے ہوئے بیانات دیے ہیں، یہاں تک کہ بعض اوقات ایک ہی دن میں اپنے موقف میں تبدیلی کرلی ہے۔ وہ کبھی صدر پوتین سے ہونے والی گفتگو کی تعریف کرتے ہیں اور پھر اسی گفتگو پر مایوسی کا اظہار کرتے ہیں۔ اسی طرح، یوکرین کو امریکی امداد کے معاملے میں بھی ان کا رویہ مسلسل بدلتا رہا ہے ،ایک ہفتے فوجی امداد معطل کرنے کے بعد اگلے ہی ہفتے اضافی امداد دینے کا اعلان کر دیتے ہیں۔