روس میں امریکی کمپنیوں کی واپسی؛ ریاض مذاکرات کا پہلا مثبت پیغام

سچ خبریں:روس کے ڈائریکٹ انویسٹمنٹ فنڈ نے اعلان کیا ہے کہ کچھ امریکی کمپنیاں 2025 کی دوسری سہ ماہی میں روس واپس آئیں گی۔ 

ٹاس نیوز ایجنسی کی رپورٹ کے مطابق روس کے ڈائریکٹ انویسٹمنٹ فنڈ کے چیف ایگزیکٹو آفیسر، کرائل دیمترییف کا کہنا ہے کہ وہ کمپنیاں جو یوکرین کی جنگ کے آغاز کے بعد ماسکو چھوڑ گئی تھیں، اب دوبارہ روس میں واپس آئیں گی۔

یہ بھی پڑھیں: امریکہ اور روس کے درمیان کیا چل رہا ہے؟

دیمترییف نے کہا کہ روس کے ڈائریکٹ انویسٹمنٹ فنڈ کو امید ہے کہ کچھ امریکی کمپنیاں 2025 کی دوسری سہ ماہی میں روسی مارکیٹ میں واپس آئیں گی،تاہم ان کی واپسی آسان نہیں ہوگی کیونکہ اب ان کی جگہ کئی دیگر کمپنیاں لے چکی ہیں۔

انہوں نے مزید کہا کہ امریکی کمپنیوں نے روس چھوڑنے کے بعد 300 ارب ڈالر سے زیادہ کا نقصان اٹھایا ہے۔

دیمترییف کے مطابق، سب سے زیادہ نقصان آئی ٹی اور میڈیا سیکٹرز کو پہنچا، جس کی مالیت 123 ارب ڈالر تھی، اس کے بعد صارفین کی خدمات اور صحت کے شعبے میں 94 ارب ڈالر، مالی خدمات کی کمپنیاں 71 ارب ڈالر اور توانائی کے شعبے میں 10 ارب ڈالر کا نقصان ہوا، مجموعی طور پر امریکی کمپنیوں کا نقصان تقریباً 324 ارب ڈالر کے قریب پہنچا ہے۔

مزید پڑھیں: امریکہ اور روس کی ممکنہ ایٹمی جنگ میں 5 ارب سے زیادہ لوگوں کے مارے جانے کا خطرہ

دیمترییف کا یہ بیان روس اور امریکہ کے درمیان ریاض میں براہ راست مذاکرات شروع ہونے کے ایک دن بعد سامنے آیا جس کا مقصد یوکرین جنگ کو ختم کرنا ہے۔

امریکی صدر ڈونلڈ ٹرمپ نے ان مذاکرات کو مثبت قرار دیتے ہوئے کہا کہ انہیں جنگ کے خاتمے کے بارے میں زیادہ اعتماد محسوس ہو رہا ہے۔