روس اور امریکہ کے تعلقات کے بارے میں پیوٹن کے معاون کا بیان

?️ 13 نومبر 2025

سچ خبریں:روسی صدر کے معاون یوری اوشاکوف نے کہا ہے کہ ماسکو اور واشنگٹن کے درمیان موجود مسائل توقع کے مطابق تیزی سے حل نہیں ہو رہے، جبکہ روسی ترجمان نے یورپ کی جنگی تیاری پر تشویش ظاہر کی ہے۔

ریانووستی نیوز ایجنسی کی رپورٹ کے مطابق روسی صدر کے معاون نے کہا ہے کہ روس اور امریکہ کے تعلقات میں موجود مسائل اس رفتار سے حل نہیں ہو رہے جس کی توقع کی جا رہی تھی۔

یہ بھی پڑھیں: امریکہ اور روس کے درمیان کیا چل رہا ہے؟

رپورٹ کے مطابق، روسی صدر کے معاون یوری اوشاکوف نے بدھ کے روز ایک بیان میں کہا کہ روس اور امریکہ کے تعلقات میں موجود مسائل اتنی تیزی سے حل نہیں ہو رہے، جتنی تیزی کی امید تھی۔

روسی صدر کے معاون نے مزید کہا کہ میں یہ نہیں کہہ سکتا کہ روس اور امریکہ کے رابطوں میں کوئی رکاوٹ ہے، لیکن اس وقت کوئی قابلِ ذکر پیشرفت بھی موجود نہیں،ان کا کہنا تھا کہ روس اور امریکہ کے درمیان مختلف سطحوں پر رابطے جاری ہیں۔

دوسری جانب، روسی صدارتی دفتر کے ترجمان دیمیتری پسکوف نے چند گھنٹے قبل ایک بیان میں کہا کہ ماسکو یورپ کو روس کے ساتھ جنگ کی تیاری کرتے ہوئے دیکھ رہا ہے۔ ان کے مطابق یورپ میں عسکری ماحول غالب ہے، اور یورپی ممالک اپنی معیشت کو نقصان پہنچانے کی قیمت پر اپنے فوجی بجٹ میں اضافہ کر رہے ہیں۔

مزید پڑھیں: امریکہ اور روس کی ممکنہ ایٹمی جنگ میں 5 ارب سے زیادہ لوگوں کے مارے جانے کا خطرہ

پسکوف نے خبردار کیا کہ دفاعی بجٹ میں یہ اضافہ یورپی معیشتوں پر شدید دباؤ ڈالے گا اور اس کے سنگین نتائج سامنے آئیں گے، انہوں نے کہا کہ ماسکو پہلے سے ہی اس خطرے کو سمجھتا رہا ہے کہ یورپ روس کے خلاف جنگ کی تیاری کر رہا ہے، اور تمام ضروری حفاظتی اقدامات پہلے سے اختیار کیے جا چکے ہیں۔