کردستان ورکرز پارٹی کے سربراہ کا مسلح سرگرمیوں کے خاتمے کا اعلان؛عالمی سطح پر خیر مقدم

سچ خبریں:بین الاقوامی اور علاقائی تنظیموں، سیاسی شخصیات اور حکومتوں نے کردستان ورکرز پارٹی (پی کے کے) کی مسلح سرگرمیوں کے خاتمے اور تنظیم کی تحلیل کے اعلان کا مثبت استقبال کیا ہے۔  

یہ بھی پڑھیں:عراقی کردستان کے لیے خطرناک امریکی منصوبہ

الجزیرہ نیوز چینل کی رپورٹ کے مطابق کردستان ورکرز پارٹی پی کے کے کے رہنما عبداللہ اوجلان کے حالیہ بیان کو خطے اور عالمی سطح پر امن کے قیام کے لیے ایک اہم پیش رفت سمجھا جا رہا ہے۔

اقوام متحدہ کے سکریٹری جنرل انتونیو گوٹریس کے ترجمان اسٹیفن دوجارک نے کہا کہ او جلان کا یہ پیغام ایک طویل المدتی تنازع کو پرامن طریقے سے حل کرنے کی راہ ہموار کر سکتا ہے، ان کے مطابق، یہ اعلان خطے میں امن اور استحکام کے امکانات کو مضبوط بنائے گا۔

عراقی وزارت خارجہ نے اپنے بیان میں کہا کہ یہ اقدام خطے میں استحکام کے لیے ایک اہم اور مثبت پیش رفت ہے،عراق جو ترکی کی فوجی کارروائیوں کے باعث مسلسل دباؤ میں رہا ہے، اس پیشرفت کو اپنے شمالی علاقوں میں امن کے قیام کے لیے مددگار سمجھتا ہے۔

کردستان ریجن کے صدر نچیروان بارزانی نے کہا کہ اب وقت آ گیا ہے کہ مسلح جدوجہد کے بجائے پرامن سیاسی طریقہ اپنایا جائے،انہوں نے اس پیشرفت کو ترکی اور کردوں کے درمیان امن مذاکرات کو آگے بڑھانے کا ایک سنہری موقع قرار دیا۔

جرمنی کی وزارت خارجہ نے اوجلان کے بیان کو ترکی میں دہائیوں سے جاری تنازع کو ختم کرنے کے لیے ایک تاریخی موقع قرار دیا، جبکہ برطانیہ نے بھی اس اقدام کو امن و استحکام کی جانب ایک مثبت پیش رفت قرار دیا۔

مزید پڑھیں:ترکی کی انٹیلی جنس تنظیم کے سربراہ کا عراق کے کردستان کا دورہ

برطانوی وزارت خارجہ کے مطابق، ترکی ایک قریبی نیٹو اتحادی اور انسداد دہشت گردی میں برطانیہ کا اہم شراکت دار ہےاور لندن تمام فریقین کو امن کے عمل میں شمولیت کی ترغیب دیتا ہے۔

پی کے کے کی مسلح جدوجہد 1980 کی دہائی سے جاری ہے اور اس تنازع میں ہزاروں افراد ہلاک اور زخمی ہو چکے ہیں، اگر تنظیم کے خاتمے کا اعلان عملی شکل اختیار کر لیتا ہے تو اس سے ترکی، عراق اور شام کے کرد علاقوں میں ایک نئی سیاسی صورتِ حال جنم لے سکتی ہے۔