اسرائیل کا ایران پر حملہ تل ابیب کی وحشی گری کی کھلی علامت ہے:الازہر 

سچ خبریں:جامعہ الازہر مصر نے اسرائیل کے ایران پر حملے کو وحشیانہ اقدام اور عالمی قوانین کی کھلی خلاف ورزی قرار دیتے ہوئے خبردار کیا ہے کہ یہ حرکت پورے خطے کو مزید جنگ کی طرف دھکیل سکتی ہے۔

المیادین نیوز چینل کی رپورٹ کے مطابق مصر کی معروف دینی و علمی درسگاہ جامعہ الازہر نے ایک باضابطہ بیان جاری کرتے ہوئے اسرائیل کی ایران پر حالیہ جارحانہ کارروائی کی شدید الفاظ میں مذمت کی ہے۔

یہ بھی پڑھیں:برطانوی انسانی حقوق کی تنظیموں کی جانب سے اسرائیل کے ایران پر حملے کی شدید مذمت 

جامعہ نے اس حملے کو نہ صرف بین الاقوامی قوانین کی صریح خلاف ورزی قرار دیا بلکہ اسے صیہونی حکومت کی بڑھتی ہوئی وحشی گری اور غیر انسانی روش کی علامت بھی کہا۔

رپورٹ کے مطابق، الازہر نے اپنے بیان میں واضح کیا کہ اسرائیل کا ایران کی خودمختار سرزمین پر حملہ ایک خطرناک پیش رفت ہے جو خطے میں مزید تناؤ، تشدد اور عدم استحکام کو جنم دے سکتی ہے۔

جامعہ الازہر نے اس موقع پر عالمی برادری، اقوام متحدہ، اور انسانی حقوق کے عالمی اداروں سے مطالبہ کیا کہ وہ صیہونی حکومت کے ان غیرقانونی اور اشتعال انگیز اقدامات کا فوری نوٹس لیں اور خطے کو ایک نئی جنگ کی آگ میں جھونکے جانے سے بچائیں۔

بیان میں مزید کہا گیا ہے کہ س طرح کے تجاوزات نہ صرف ایک آزاد ملک کی خودمختاری پر حملہ ہیں بلکہ پوری اسلامی دنیا کے جذبات کو مجروح کرنے کے مترادف ہیں۔”

جامعہ الازہر نے اسرائیل کے اس اقدام کو غاصب و متجاوز حکومت کی فطری روش قرار دیتے ہوئے کہا کہ ایسی کاروائیاں ایک سازش کے تحت خطے کو مسلسل کشیدگی میں مبتلا رکھنے کی کوشش ہیں۔

مزید پڑھیں:اسرائیل پر فتح ایران کے ہاتھوں ہوگی: عمان کے مفتی اعظم

الازہر نے آخر میں تمام مسلمان ممالک، عرب لیگ، اور اسلامی تعاون تنظیم (OIC) سے بھی اپیل کی کہ وہ متحد ہوکر اس جارحیت کے خلاف مشترکہ لائحہ عمل اختیار کریں۔