اسرائیل نے 85 فیصد غزہ کو فوجی علاقہ قرار دے دیا؛ آنروا کی شدید مذمت

سچ خبریں:اقوام متحدہ کے ذیلی ادارے آنروا کا کہنا ہے کہ اسرائیل نے غزہ کے 85 فیصد حصے کو فوجی علاقہ قرار دے کر لاکھوں فلسطینیوں کو جبری بےدخل کیا ہے۔ آنروا نے اسرائیلی جارحیت کی مذمت کرتے ہوئے فوری جنگ بندی کا مطالبہ کیا ہے۔

 الجزیرہ کی رپورٹ کے مطابق اقوام متحدہ کے ادارہ برائے فلسطینی پناہ گزینوں (آنروا) نے غزہ میں اسرائیل کے فوجی اقدامات پر شدید تنقید کی ہے، رپورٹ کے مطابق، آنروا نے بتایا کہ اسرائیلی افواج نے غزہ کی پٹی کے 85 فیصد حصے کو زبردستی خالی کرا کر اسے فوجی علاقہ قرار دے دیا ہے، جہاں جبری بےدخلی کے احکامات جاری کیے گئے ہیں۔

یہ بھی پڑھیں:آج بھی غزہ میں کربلا برپا ہے اور عالم اسلام خاموش ہے، خواجہ آصف

آنروا کی تازہ ترین رپورٹ کے مطابق، مارچ میں اسرائیل کی جانب سے جنگ بندی معاہدے کی خلاف ورزی کے بعد سے اب تک 7 لاکھ 14 ہزار سے زائد فلسطینی ایک بار پھر اپنے گھروں سے بےدخل ہو چکے ہیں۔ رپورٹ میں مزید کہا گیا کہ غزہ میں ایندھن کا بحران شدید تر ہو گیا ہے، کیونکہ گزشتہ چار ماہ سے اس علاقے میں کوئی بھی ایندھن نہیں پہنچ سکا۔

آنروا نے خبردار کیا کہ غزہ میں صحت و علاج کی ضروریات کو پورا کرنے میں سنگین عملی مشکلات درپیش ہیں۔ ان مشکلات میں طبی مراکز کی وسیع پیمانے پر تباہی، مریضوں اور طبی عملے کی محفوظ نقل و حرکت میں رکاوٹیں، اور طبی سامان و ایندھن کی ترسیل پر سخت پابندیاں شامل ہیں۔ ان مسائل کے باعث شہریوں کی جانیں شدید خطرے میں ہیں۔

مزید پڑھیں:غزہ کی پٹی میں ممکنہ جنگ بندی کی تفصیلات جاری

آخر میں، آنروا نے اسرائیلی حکومت کی جانب سے فلسطینی شہریوں پر جاری بربریت کے فوری خاتمے اور اس خطے میں فوری جنگ بندی کے نفاذ کا مطالبہ کیا ہے، اور اسے موجودہ صورتحال میں سب سے بہترین حل قرار دیا ہے۔