موزمبیق میں داعش کی وحشیانہ کاروائی، متعدد غیرملکی افراد کے سر قلم کردیئے

🗓️ 10 اپریل 2021

موزمبیق (سچ خبریں) موزمبیق میں داعش کی دہشت گردی بڑھتی جارہی ہے اور کئی عرصے سے دہشت گرد تنظیم داعش کی جانب سے حملے کیئے جارہے ہیں جن میں درجنوں افراد ہلاک ہوچکے ہیں اور اب داعش نے نئی وحشیانہ کاروائی کرتے ہوئے متعدد غیرملکی افراد کے سر قلم کردیئے ہیں۔

تفصیلات کے مطابق کمانڈر پیڈرو ڈا سلوا نے 60 ارب ڈالر کے قدرتی گیس منصوبوں کے قریب شہر کا دورہ کرنے والے صحافیوں کو بتایا کہ وہ 12 افراد کی قومیت کے بارے میں یقین سے نہیں کہہ سکتے تاہم ان کا خیال ہے کہ وہ سفید فام ہونے کی وجہ سے غیر ملکی ہیں۔

ٹیلی ویژن چینل پر نشر کی گئی ایک ویڈیو میں ان کا کہنا تھا کہ ‘ان افراد کے ہاتھ اور پیر باندھ کر سر قلم کیا گیا اور پھر انہیں دفنا دیا گیا تھا۔

شمالی کابو ڈیلگاڈو صوبے، جہاں پالما شہر واقع ہے، داعش 2017 سے سرگرم ہے جبکہ یہ واضح نہیں ہے کہ ان کا کوئی مشترکہ ہدف ہے یا نہیں۔

جنوبی افریقہ، زمبابوے اور بوٹسوانا سمیت دیگر ممالک کے علاقائی رہنماؤں نے جمعرات کے روز موزمبیق کے دارالحکومت میپوٹو میں ملاقات کی تاکہ تشدد کے رد عمل پر غور کیا جاسکے۔

موزمبیق کی وزیر خارجہ ویرونیکا میکامو دلہووو نے کہا کہ رہنماؤں نے رواں ماہ موزمبیق میں ایک وفد بھیجنے کا عزم کیا ہے۔

انہوں نے کہا کہ یہ وفد اس خطرے کے طول و عرض کا جائزہ لینے کے لیے آئے گا۔

موزمبیق میں تکنیکی تعیناتی کے حوالے سے جمعرات کے اجلاس کے بعد جاری ہونے والے ایک بیان میں کہا گیا کہ علاقائی بلاک ایس اے ڈی سی کے مزید اجلاس طلب کیے جائیں گے۔

حکومت نے کہا کہ 24 مارچ سے شروع ہونے والے تازہ حملے میں درجنوں افراد ہلاک ہوچکے ہیں اور امدادی گروپس کا خیال ہے کہ ہزاروں افراد بے گھر ہوگئے ہیں تاہم ان ہلاکتوں اور بے گھر ہونے کے صحیح اعداد و شمار واضح نہیں ہیں۔