ایران سعودی عرب کو تباہ کر سکتا تھا:سعودی سابق انٹیلی جنس چیف

?️ 14 مئی 2026

سچ خبریں:سعودی انٹیلی جنس کے سابق سربراہ ترکی الفیصل نے انکشاف کیا ہے کہ اسرائیل ریاض کو ایران کے خلاف جنگ میں دھکیلنا چاہتا تھا، جبکہ ایران سعودی تیل تنصیبات اور واٹر پلانٹس کو نشانہ بنانے کی صلاحیت رکھتا تھا۔

سعودی عرب کے سابق انٹیلی جنس چیف شہزادہ ترکی الفیصل نے غیر معمولی بیان دیتے ہوئے انکشاف کیا ہے کہ اسرائیل، سعودی عرب کو ایران کے ساتھ براہ راست جنگ میں دھکیلنے کی کوشش کر رہا تھا، تاہم ریاض نے سفارت کاری اور تحمل کا راستہ اختیار کیا۔

بین الاقوامی میڈیا رپورٹس کے مطابق ترکی الفیصل نے اسرائیلی پالیسیوں پر سخت تنقید کرتے ہوئے کہا کہ تل ابیب خطے میں اپنی بالادستی قائم کرنے کے لیے سعودی عرب اور ایران کے درمیان فوجی تصادم چاہتا تھا۔

انہوں نے کہا کہ سعودی قیادت نے خلیج فارس کو ایک تباہ کن جنگ سے بچانے کے لیے کشیدگی کے بجائے سفارت کاری اور سیاسی حل کو ترجیح دی، کیونکہ ایسی جنگ پورے خطے کے امن، توانائی اور معاشی استحکام کے لیے خطرناک ثابت ہو سکتی تھی۔

ترکی الفیصل نے کہا کہ امریکہ اور اسرائیل کی جانب سے ایران کے خلاف جنگ شروع ہونے کے بعد مختلف علاقائی اور مغربی میڈیا حلقوں میں سعودی عرب کے مؤقف پر سوالات اٹھائے گئے، حالانکہ ریاض ابتدا ہی سے جنگ روکنے اور تنازع کو سفارتی ذرائع سے حل کرنے کی کوشش کرتا رہا۔

سابق سعودی انٹیلی جنس چیف نے اعتراف کیا کہ اگر سعودی عرب براہ راست ایران کے خلاف فوجی کارروائی کرتا تو اس کے سنگین نتائج سامنے آ سکتے تھے۔

انہوں نے کہا کہ اگر ریاض ایران کی تنصیبات کو نشانہ بناتا تو اس کے جواب میں سعودی عرب کی تیل تنصیبات، ساحلی انفراسٹرکچر اور سمندری پانی کو قابل استعمال بنانے والے واٹر ڈیسالینیشن پلانٹس شدید حملوں کی زد میں آ سکتے تھے۔

ترکی الفیصل کے مطابق ایسی صورت میں خلیجی خطہ بڑے پیمانے پر تباہی، معاشی بحران اور انسانی نقصانات کا شکار ہو جاتا جبکہ اسرائیل خطے میں اپنی مرضی مسلط کرنے میں کامیاب ہو جاتا۔

انہوں نے مزید کہا کہ سعودی ولی عہد محمد بن سلمان کی "دوراندیشی” کے باعث سعودی عرب اس ممکنہ جنگ کے تباہ کن اثرات سے محفوظ رہا۔

ترکی الفیصل نے یہ بھی دعویٰ کیا کہ سعودی عرب اس وقت پاکستان کے ساتھ مل کر خطے میں کشیدگی کم کرنے اور جنگی ماحول کو ٹھنڈا کرنے کی کوششوں میں مصروف ہے تاکہ خطے میں استحکام برقرار رکھا جا سکے۔